「我不是一個成功的人，但是一個負責任的人，我對自己的家庭，對我身邊的朋友，已經是盡了我的努力、我的責任。」張栢芝對38歲嘅自己做咗一個咁樣嘅評價。年輕時嘅張栢芝的確予人「野孩子」嘅感覺，當年同霆鋒離婚，兩個仔由佢撫養，小編記得外間幾乎冇人睇好，都係一啲冷言冷語。不過，時間證明咗一切，栢芝對佢嘅小朋友照顧得非常妥貼，外間嘅聲音亦由謾罵，變成漸漸認同佢係一個好媽媽。
大半生為旁人付出
片中見張栢芝去到街市買餸，同檔主都非常熟絡，好明顯係買慣買熟。栢芝幾乎每一日，唔止係買嘅餸，仲去幫佢嘅親戚朋友買埋，佢話因為心痛佢哋要湊孫同做家務，話反正自己會順便買埋畀佢哋，佢講起嘅時候，都不以為然。成日為人，佢會唔會覺得好攰？栢芝經理人都問過佢，成日都付出，壓力會唔會好大？我話反而一啲都冇:「我38歲，大半生，我可以肯定到之後，都係以家庭為先。」佢話20年前冇諗過自己20年後會係點，只係肯定自己一定會有一個小朋友，結果依家有3個。
細細個已經幫手照顧細佬。
囝囝完滿人生
栢芝小學８歲已經覺得小朋友係最單純最好，佢話日日見到佢哋，已經覺得個世界好漂亮：「我唔知其他女性點諗，我自己從小到大都覺得生咗小朋友，成個（人生）先係完整。」每個月雖然畀咗萬幾蚊車費，但栢芝都經常車佢兩個仔返學：「同佢哋傾偈，去便利店買零食，嗰種快樂、嗰種時光，返到去屋企打機係冇㗎，我自己覺得（令小朋友）好有安全感，直接就有一種母親嘅愛包圍住。」較富裕嘅家庭固之然可以畀到較優渥嘅生活環境畀小朋友，但「養育」小朋友仲要付出好多心血，唔係有錢就可以做得到。
自揭生細仔原因
之後栢芝去到街市檔口幫「小王子」買底衫，檔主都認得佢之前已經買過，網民都大讚佢非常貼地。栢芝透露「小王子」成長得好快，3個月大已經15磅。同檔主傾偈嘅時候，母愛氾濫。栢芝話如果小朋友長大咗離開佢，佢一定會失落：「所以我咪繼續生落去，係咁生，等佢哋大又生一個…大又生一個，當然呢個肯定冇可能，不過我真係好鍾意小朋友。」生小朋友要畀好多時間，可能會錯失一啲好機會，但栢芝並冇覺得可惜：「如果要得到一些東西，必須放棄一些東西，如果我繼續去賺錢去（追）女演員高峰，就冇三個咁可愛嘅小朋友。」 睇住佢哋長大栢芝覺得畀任何工作更加重要。
栢芝與其母親（左）
習慣犧牲
「可以為愛嘅人犧牲，係好大嘅福氣。」栢芝呢句說話雖然好鬼言情小說，但佢亦的確「講得出，做得到」。又或者係因為咁，佢先會喺情路上跌跌跌踫踫。不過佢仍然覺得要愛就愛，唔好保留，就算傷心、難過都係一個經歷。佢話家庭對佢嚟講唔係分裂或者合埋，單唔單親呢個問題呢個係藉口嚟嘅，佢形容自己都係單親，離婚都好陽光好彩色：「好記得9歲嘅時候，父母要離婚，我好支持，因為佢覺得佢哋成日鬧交，既然相處得咁辛苦不如分開。」
「38歲的張栢芝非常幸福，38歲的張栢芝非常滿足。」栢芝雖然滿意現況，但佢仍然冀盼搵到佢嘅Soulmate：「我要一個靈魂伴侶，要一個同我可以分擔到、傾到偈、明白對方嘅伴侶。」