【香港始終有你】張繼聰跌銀包慌到想喊 感動勁讚路不拾遺善心人

張繼聰尋日深宵一口氣喺自己嘅社交網上載咗3條短片，事緣係佢尋日非常失魂，喺商場跌咗銀包。幸好有好心人唔貪心，路不拾遺，佢先至可以失而復得：「今日發生咗一樣從來未試過嘅嘢，就係喺街唔見咗銀包。咁好慌好想喊嘅時候，同啲保安哥哥講，點知原來真係有人執咗，然後交咗畀佢哋喎，所以喺度想多謝幫我執番呢個銀包嘅朋友啦！好多謝你！同埋多謝又一城嘅保安哥哥們，多謝你哋！原來香港仲係充滿好多好友善；心地好好嘅人嘅，多謝你！」

{{hket:inline-image name="3.jpg"}}{{/hket:inline-image}}

{{hket:inline-image name="2.jpg"}}{{/hket:inline-image}}

之後佢就話原來個銀包對佢嚟講好有意義，用咗好多年：「咁呢個銀包對於我嚟講好特別，因為係太太（謝安琪）十年前送畀我嘅，攞番銀包之後先諗，其實依家身邊嘅嘢好少用多過十年㗎喇……啲隨身物品，咁所以真係好有價值，多謝你哋！」好多嘢都真係用錢都買唔到，阿聰真係念舊又長情，唔知點解小編覺得畀佢無意間閃咗一吓。老婆送嘅禮物珍而重之咁用咗十年，真係好難得！

{{hket:inline-image name="50640878_205184160346787_1525571024476314918_n.jpg"}}{{/hket:inline-image}}

如果香港多啲為人着想嘅善心人，社會一定會更加和諧同美好！