同是天涯淪落人

2日前

趕在香港電影金像獎頒獎典禮前，看了《淪落人》的早場，晚上睇住佢贏晒新晉導演、最佳新演員，黃秋生更做了影帝，特別投入。

講的是因意外而導致半身不遂的昌榮和菲傭Evelyn，和工友兼老友之間的感情；雖然同是天涯淪落人，但只要有真心者於通道上同行，也不會過得心灰暗面。同樣是講輪椅上的人和照顧者的故事，同樣感人又正面，仍然上映中的荷里活電影《閃亮人生》其實也非常出色，M卻比較偏愛《淪落人》，眼濕濕感動位起碼有四大個喎︰「因為更貼身貼地很香港。」外傭明明是本城很多家庭的中流砥柱，假日兜口兜面坐滿各處，卻偏偏活得像隱形人一樣。還有玩到好盡的廣東話對白，只有我們才心領神會。當然，黃秋生的演出完全是神級，那一幕他講完一次又一次︰「我只係路過㗎咋，點解要係我呀？」沒有over晒的呼天搶地，卻充滿了對命運的怨鬱不解，人如蜉蝣，渺小無助，好揼心好touching。其中李璨琛的角色其實最有光環，那一種「情義兩心知」，是淡淡然的理所當然，叫人很感動。

無論是自己或身邊人坐咗喺低谷，仲可能唔知坐幾耐，一直dry愁dry恨dry擔心其實都無補於事，個人或許企唔到起身，嗰「一念」可以。

3個月前

G說最近從舊上司英國人H身上學了一課，想也沒想到可以如此being human，有人性有同理心。

話說G一行人擇日上門造訪H，他微笑着向其菲律賓外傭介紹大家是Saatchi & Saatchi的舊同事，人人有名有姓，沒有隱形，包括了這外傭，氣氛愉快文明。G︰「就像是朋友一樣，應該係話，正常人就是這樣，見到面梗係會介紹。」尊貴高層，高貴人品，H先生，真值得respect呀！

（本欄逢周二刊登）