《鐵探》入面，垶Sir（袁偉豪飾）的主要拍檔快活谷（梁競徽飾，前名：梁烈唯）、細超（余德丞飾）、阿茵（張寶兒飾）同阿城（謝東閔飾），他們出生入死，更齊齊出錢為快活谷還卡數，為了是齊齊完成品德檢查，加入毒品調查科幫助垶Sir。其中唯唯飾演的快活谷經常都穿花碌碌恤衫，跟角色吊兒郎當的個性不謀而合，而且他幾乎日日不同款，單是「夏老威」花恤衫都十幾件，成為他的標記之一，有網友特別剪緝他花恤衫的特輯做成短片，認真搞笑。劇中快活谷曾經擔任臥底工作，眼見Handler邱勵進被山狗殺害，心裡面非常內疚，直至第7集，他終於信任垶Sir將自己的秘密講出來時，演技大爆發，在哭與忍痛之間滿眶淚水，令不少煲劇專頁和網友都讚他演技大有進步。
唯唯這一幕向袁偉豪爆秘密，演出男人的痛心。（圖片：《鐵探》電視截圖）
劇中入面唯唯每日都有好多不同款嘅花恤衫。（圖片：《鐵探》電視截圖）
他笑言拍劇時有超過十件替換，涼爽又舒服。（圖片：《鐵探》電視截圖）
呢一件圖案印花算係比較素色嘅一件。（圖片：《鐵探》電視截圖）
唯唯接受《晴報》專訪，他表示：「夏老威真係著得好舒服，拍攝時係上年4至5月，天氣都幾熱，我就感覺好涼爽，而且花恤衫又好切合我角色性格，本身連個頭都唔想梳，不過話晒警察公共關係科會睇，太核突會影響警隊形象，所以每次整完頭都好似無乜點整咁，少少唔整齊但又唔太亂。」唯唯曾經被網友形容為「負皮王」，負面評論不斷，但他一直默默苦幹，少說話多做事，今次《鐵探》終於演出成績，對於網友力讚演技有進步，唯唯說：「多謝大家支持，其實我真係好多謝編審同編劇，佢哋花三年去寫呢個劇本，真係好感動，好多謝佢哋信任我，畀我去演『快活谷』呢個角色，吊兒郎當之餘又要怕死，蔣祖曼飾演嘅黑社會大嫂出場之後，角色就會有另一個層次出嚟，大家追落去睇，就會明白呢個人經歷好多好多，先會變成依家咁樣。（演技獲肯定吐氣揚眉？）我唔敢講吐氣揚眉，但我真係好感恩同安慰，觀眾朋友重新將注視放喺我工作上面，我係演員，演員責任就係演好個角色，帶出一個全新的我嘅感覺，好好將娛樂帶到畀大家。」唯唯透露劇集在內地同步播放，自己在微博的粉絲數量都有慢慢上升，他期望不只他，劇入面的台前幕後所有工作人員都透過這個劇而讓大眾認識，將來可以更加勇敢將自己創作的作品帶給大家。
提到較早前本報踢爆網上已經快活谷、阿城同細超的下場預告，指三人將會被炸到粉身碎骨，（報道重溫：http://bit.ly/2YBVVFK）唯唯表示：「我哋個下場係慘嘅，不過就算被爆出嚟都唔太擔心個追看性，因為最好睇係個過程，我之前上《今日VIP》都透露，快活谷同垶Sir呢對好兄弟係會決裂，我好Hurt、佢亦都好Hurt，大家知道結果但反而會想知道個過程點解會發生，所以唔擔心影響收視。」
唯唯感激網民的認同同支持，希望全劇台前幕後都獲得讚揚。（《晴報》圖片）
他感激編審信任，讓他演活「快活谷」的角色。（《晴報》圖片）
唯唯稱劇集播出後，微博粉絲的數量都慢慢上升。（《晴報》圖片）