48歲洪欣同後生佢9歲嘅張丹峰結婚10年，近年屢傳婚姻危機。之前傳張丹峰經理人畢瀅介入佢哋婚姻，當時洪欣力撐老公，張丹峰亦高調發聲明澄清。到今年2月，洪欣突然好有感觸地發文：「怎麼才可以做個聰明的女人，我太笨了。」又惹嚟婚變傳聞。
（洪欣同張丹峰,張丹峰微博圖片）
（2月洪欣突然感觸地發文,洪欣微博圖片）
近日再有內地傳媒影到張丹峰同經理人畢瀅喺酒店密會嘅相，並指畢瀅有張丹峰房卡，佢可自由出入男方嘅房間。到咗夜晚時分，畢瀅更身穿睡褲拖鞋入張丹峰酒店房間，直到凌晨一點多才離開，兩人在房間中單獨共處3小時。
（張丹峰同經理人不時親密合照, 張丹峰微博圖片）
一時之間，令洪欣同張丹峰婚變傳聞再次加劇，網上更流傳張丹峰工作室嘅文件，指畢瀅係公司嘅大股東。而有眼利嘅網民發現，洪欣自老公出軌傳聞爆岀後，佢微博已刪除大部分同老公嘅合照，只剩下一張同遊迪士尼嘅相，似乎要話畀大家知佢忍無可忍，要劃清關係。
(早前洪欣18歲兒子張鎬濂（Ashley）於內地選秀節目《以團之名》岀道，亦得洪欣獨自見證，唔見張丹峰蹤影, 洪欣微博圖片）
(洪欣微博怒刪同老公張丹峰合照，只剩下呢張，洪欣微博圖片）
洪欣經歷三段感情屢遇負心漢
面對老公岀軌，婚姻岀現問題，好多人都心痛洪欣現時處境。48歲嘅洪欣1990年入行，演岀過唔少電視劇如《魔刀俠情》、《原振俠》，佢後生真係索到爆，可惜情路就非常坎坷。洪欣有過三段感情，同第一任老公黃國梁結婚短短一年，就遺憾離婚收場，之後1997年遇上莫少聰，洪欣滿心歡喜為佢生下囝囝張鎬濂，以為終遇到真愛，點知莫少聰都係個負心漢，洪欣生完仔佢即刻撇清關係，不單止唔肯同洪欣結婚，開頭更唔承認張鎬濂係自己個仔。傷心欲絕嘅洪欣只有離開，以單親媽媽身份撫養兒子，一個女人仔實在唔容易。莫少聰多年嚟鮮有見過個仔，亦無同阿仔聯絡，完全無負身為爸爸嘅責任，而且同洪欣嘅關係亦唔太友好，前年先試過公開喺網上反咬洪欣多年嚟一直抹黑佢，搞到佢生活過得唔好，影響同現任女友關係。就算分開咗，洪欣仲成日俾莫少聰煩住，真係好慘！
(洪欣微博圖片）
做咗單親媽咪一排，洪欣遇上現任老公張丹峰，令佢再次相信愛情，二人於2009年結婚。張丹峰同洪欣一開始不被大眾睇好，俾人貼上「女尊男卑」、「姊弟戀」嘅負面標籤，不過佢哋好努力洗走負評，慢慢大家都覺得哋好恩愛。
（張丹峰微博圖片）
點知10年婚姻感情都敵不過第三者，舊年已經開始傳岀張丹峰背妻偷食，搭上經理人畢瀅，而家仲公開喺酒店密會。網友更掘岀張丹峰同畢瀅的「親密」互動，指張丹峰出軌早有蛛絲馬跡，佢曾私下為畢瀅慶祝生日，而且二人經常形影不離，合照亦好親密，又疑似戴情侶戒指。不過點都好，相信大家都希望洪欣可以快啲收拾心情，仲有好多親友家人支持佢呀！
（張丹峰微博圖片）