《鐵探》奸角林利看透生死 曾患直腸癌 開刀割11cm腫瘤

無綫重頭劇《鐵探》，陣容鼎盛，位位都係好戲之人。而近年已減產嘅林利，亦有份參演。昨晚終於出場嘅林利，飾演大威，係黑幫山狗嘅手下，兩人稱兄道弟，大威喺劇中更加係為咗山狗可以不惜一切。而喺現實中，林利同樣亦係一個「不怕死」嘅人。

{{hket:inline-image name="320222.jpg"}}{{/hket:inline-image}}

兩年前，林利經常大便出血，徵詢過好多朋友嘅意見，大家都認為係痔瘡小毛病，於是未有為意。直至後來睇到政府嘅宣傳片，呼籲年過50歲要接受腸道檢查。林利進行檢查後，發現患上直腸癌，接近第三期。林利坦言冇諗過自己會患上腸癌，佢指過去廿年嘅生活都非常健康，一向早睡早起，飲食清淡，更甚少出席朋友之間嘅聚餐。不過由於身邊不少朋友都有此病，所以佢對自己患上直腸癌未有太大反應，用平常心面對。

{{hket:inline-image name="28870115_10216357782764177_2661135126893713105_n.jpg"}}{{/hket:inline-image}}

林利去年入院做手術，進行了長達3小時嘅微創及剖腹手術，成功將11cm長嘅腫瘤割除。佢指：「本來係喺肚臍上面開4個窿做微創，但後來發現腫瘤太大，要喺肚臍下再開多刀。手術後，我都只係打咗一次嗎啡止痛，之後就忍住痛，唔想食止痛藥。」佢又指手術後已經冇事，因自己抗體好厲害，癌細胞亦冇擴散到其他地方，所以唔使進行化療及電療。而佢當時亦未有因病取消工作，手術後不久就開工拍攝《鐵探》。

{{hket:inline-image name="66ns0002opp1393s84q5.jpg"}}{{/hket:inline-image}}

林利認為患癌可能係上天畀佢嘅考驗或指引。向來將生死睇得好開嘅林利，直言自己唔怕死，驚都未驚過。佢認為樂觀面對，反而對病情更有幫助。「癌症係一樣好得意嘅嘢，你愈驚就愈嚴重，你要真係唔好怕，咁個病就會畀你克制住，心態好重要，千祈唔好得把口講。」充滿正能量嘅林利，不但戰勝癌症，早前更成功「脫單」，喺社交網站上宣布戀愛喜訊，真係戥佢開心呀！