43歲滕麗名同老公朱建崑自結婚以嚟一直甜蜜到爆，阿滕不時做「跟得夫人」陪老公周圍去，近日兩公婆孖住到日本滑雪，一滑就10日，真係精力無窮。阿滕仲好享受咁講：「我鍾意老公帶我去BACK COUNTRY，有時要行山，去一啲冇乜人嘅地方，然後再落番嚟，路程有長有短，可以接觸到大自然嗰種宏偉。」滕麗名仲喺社交網絡同大家分享，跟老公滑雪嘅開心照片，眼見佢而家同老公咁sweet，真係好替佢高興，事關阿滕多年來情路相當坎坷，經歷情傷不少。
(滕麗名ig圖片)
(滕麗名ig圖片)
滕麗名身材、樣貌都keep得好，好難想像係一個出道超過20年嘅「前輩」級人馬。當年阿滕一頭清爽短髮喺當家花旦中非常突出，98年憑《陀槍師姐》陳三元一角成功彈出，成為無綫力捧花旦之一。佢同拍檔魏駿傑合作而撻著，拍拖9年。二人去到談婚論嫁地步，點知魏駿傑移情別戀，突然戀上年僅19歲嘅張利華，狠飛滕麗名，仲同後生女張利華結埋婚、生埋女。魏駿傑自此被冠上負心男罪名，形象插水，社交網站更不時受到網民攻擊，後來魏駿傑竟然連阿滕都鬧埋：「這種賤人趁早撇低，否則後悔一輩子！」搞到阿滕鬼咁激氣。
(滕麗名ig圖片)
之後滕麗名又遇上一腳踏兩船嘅郭政鴻，二人於2007年合作《野蠻奶奶大戰戈師奶》擦出愛火花，發展了近兩年的地下情後，阿滕突然自爆回復單身。原來郭政鴻同佢拍拖嘅同時，同另一個貌似前妻嘅蘇姓女子岀軌，個第三者仲為郭政鴻生咗個女，而滕麗名一直蒙在鼓裡，嬲到阿滕即刻分手。
滕麗名早年可謂受盡情傷，直至遇上現任老公朱建崑，佢先守得雲開成幸福人妻，面對同老公嘅相處，佢自有一套心得，研究岀獨有嘅馭夫術！
入得廚房出得廳堂
滕麗名自嫁人後不但無變肥師奶，反而愈來愈有睇頭，女人味十足。尤其是佢做咗豐胸代言人，上圍成功升cup，信心都返晒嚟，歐陽震華都曾經大讚過佢︰「阿滕依家索到震呀！」滕麗名唔止睇得，亦好有內在美，喺屋企煮得一手好餸，佢曾為奶奶生日炮製「八餸一湯」招呼親友，非常有本事，唔怪得老公錫到燶。
為老公安排打點好一切
滕麗名就算要拍劇，幾忙都好，朝早一定會錫啖老公先，又抽時間一齊食早餐。阿滕知老公鍾意做刺激嘅運動，就成日陪佢去滑雪、玩水上運動。當兩人去旅行，阿滕又會安排好行程，訂好餐廳吃飯，有個咁細心嘅老婆，喺男人都冧爆！
(滕麗名微博圖片)
用愛感動老公回家
朱建崑嘅性格樂天又顧家，不過佢份人好外向，成日鍾意留係街，總係有做唔完嘅事，將時間填到滿一滿，好少返屋企，而阿滕就有小秘訣：「作為太太，如果個老公唔鍾意回家，我就將家打理得好乾淨、煮佢鍾意食嘅餸菜、又或者約一啲朋友返屋企玩，吸引老公回家。」阿滕仲話：「對男人絕對不唔可以強硬，只要佢明白你對佢真心，對你嘅說話就唔會太抗拒。」
(滕麗名微博圖片)