張兆輝與老婆郭碧妍是圈中有名的模範夫婦，結婚多年一直恩愛如昔，讓人羨慕不已。身為愛妻號的張兆輝一向十分愛錫老婆，日前是他們結婚22周年紀念日，張兆輝在社交平台上載了跟老婆的合照與一幅自製卡通合成圖，只見圖中的張兆輝把老婆公主抱起，搞笑得來又好甜蜜。除此之外，張兆輝他更感激老婆多年來的陪伴，公開表白：「當年的今天謝謝你給我一個丈夫的身分，我認識你時，你21歲，謝謝你陪伴了我那麼多年，結婚22周年快樂。我的張太太！」相信老婆睇完一定好冧豬。其實張兆輝又豈止這招，多年來他都很專一，為老婆禁絕異性埋身，默默工作、投資賺錢養家，一家四口幸福滿瀉。
狂打本予老婆做生意
現年56歲的張兆輝生於清貧家庭，小時候居於沙田美林邨附近的木屋區，家有4兄弟姊妹。由於無心向學，1982年聽從老師意見投考TVB第11期電視藝員訓練班。出道初期張兆輝多是行行企企的茄哩啡，沒有發揮機會，直至1986年才在《神勇CID》、《黃金十年》嘗試擔任第一男主角，可惜人氣依然淡薄，中途離開TVB時僅收萬餘元的藝員底薪。
1997年，張兆輝與郭碧妍領證結婚，兩人婚後育有一子一女，兒子名叫張焯鏗Edison，女兒張卓姿Twiggy，組織了一家四口的幸福家庭。婚後不久，愛妻第一的張兆輝就已經打本給老婆做美容生意，雖然一開始只是一間土瓜灣美容院地鋪，不過幸好老婆精明賢淑，財務策劃、交際應酬統統都安排好，如今「醫之美」負責批發貨品到全港，以至美加，東南亞各大小美容院，連周潤發都是長期熟客，兩公婆1年生意額估計以千萬元計，撈到風生水起。另外，為慶祝同老婆結婚18周年，張兆輝又再打本，與幾位友人合資近億元在中環威靈頓街開珠寶店贈老婆，全因老婆醉心翡翠。店名「安碧」更以太太的碧字命名，有知情人士就話：「輝嫂好鍾意翡翠，佢見係老婆嗜好，咪當結婚周年禮物送俾老婆，千金難買老婆心頭好！」，簡直錫到老婆燶。
▼老婆舊時靚樣
堅持天天與老婆通電話
儘管與老婆已經結婚22載，張兆輝仍然好愛她。2014年憑《恐怖在線》榮獲雙料影帝後，張兆輝片約接到冇停手，密密賺的他除了拍戲、拍TVB劇之外，更需要不時返上大陸登台、上節目搵真銀。就算經常要回內地工作，被迫同老婆仔女分隔兩地，張兆輝都好有信心地說二人感情絕不會變：「其實對我嚟講，工作唔係最重要，家庭從來都係放喺第1位，每次一收工我就即刻搵老婆傾偈。我哋日日都好新鮮㗎！愈去諗反而愈不新鮮，兩個人嘅關係有心去維繫，真係日日都會好新鮮。」
不斷製造浪漫驚喜晒恩愛
張兆輝很會為老婆製造浪漫驚喜，是個浪漫好老公。例如結婚19周年最有驚喜，他說：「當時我喺大陸拍緊嘢，託咗佢家姐送花同鑽石戒指畀佢，氹到佢好開心。以前覺得食餐飯咪得囉，但依家學識佢鍾意花咪送俾佢囉，最緊要老婆開心。」於20周年紀念日時，張兆輝亦有在微博大晒恩愛：「20年前的今天，令我改一生的開心日子，多謝你的陪伴，無論你肥定瘦，我的心還是一樣。」，冧死老婆。
禁絕異性誘惑 粉絲撩上床堅決說不
保養得宜的型男張兆輝皮膚光滑，而且操得一身肌肉，完全不似56歲，自然好受女性歡迎。他自爆收到不少大陸女粉絲熱情私信，有部份更加視他為幻想對象，稱要與他上床，甚至話「戀上你的床」，內容意淫又大膽。不過張兆輝不為所動，講到明頂潔身自愛，禁絕異性外來誘惑。他又自嘲性格木獨，故老婆對他絕對信任：「以前啲女影迷會讚我有型，依家竟然話要同偶像上床！我好清楚知道自己想要乜嘢，盡量少去一啲場合，咩時候要做咩嘢。我平時都係返工、放工、返屋企，喺大陸收工就返酒店，唔去應酬，所以唔擔心有女影迷會搵到上房。眼見好多女人鍾意嘅男士都係好健談、好識搞笑、好識搞氣氛，我呢啲木木獨獨咁坐喺度，邊有人埋身呀。」
不僅如此，張兆輝還公開派定心丸，讚到老婆天上有地下無，是世上最索的女人，非常識做；「我相信冇一個女人索過我老婆呀，同埋大家代入咗角色，覺得呢個男人好顧家，好好，先會咁樣，隔得幾個月，啲影迷就會對我淡晒。太太就話我好彩，有咁多人鍾意我，但我都要多謝太太，係佢塑造我，令我皮膚好好。」 張兆輝演技好、有上進心、專一顧家，這麼好的老公該去哪裡找呢？原來除了張衞健，張兆輝也是圈中絕世好男人。