邊個話TVB捧唔到星架，雖然藝員部唔多掂，但新聞部就誇啦啦，多年來捧出一個又一個星級主播，從趙海珠、林燕玲、黃紫盈，再到近期少少嘅陳嘉倩，可謂風靡唔少宅男！不過要數最高調兼惹是非嘅定非周嘉儀莫屬，當年仲喺TVB個陣，就因為驚爆戀上有婦之夫許方輝，換來第三者污名，到離巢後又戀上全國政協林健鋒兒子林凱章，更被發現拍拖到名店shopping，可惜最終兩人於本年初分手。
雖然情路崎嶇，不過周嘉儀的事業發展就唔錯，離開TVB後轉戰證券業，現為興業證券市場拓展部聯席董事，閒時仲拍廣告賺外快，早前又加盟亞視主持節目《香港追擊搜》，而佢仲好貼地，幾乎日日玩IG分享自拍派軍糧，不過她近日的一張自拍照就竟然惹來爭議，事關相中所見，嘉儀BB刻意抬起左手大晒佢隻鑲滿石嘅勞力士地通拿，真係搶眼到爆，弊在佢隻錶影到鬆郁矇，惹來唔少網民贈興：「呢隻錶起碼值成百個，佢仲擺個咁嘅POST咁晒法，乜亞視真係咁好搵咩？」、「啲錢有幾易賺就唔知，不過張相影成咁，分分鐘係A貨都唔奇。」不過亦有網民力撐嘉儀BB：「佢做緊證券，隨時一個number都唔止一百萬啦，佢專登影到咁，費事整盲大家咋。」其實要平息風波好簡單，嘉儀BB只要再晒多次隻錶，證明貨真價實，咁咪得囉！
周嘉儀IG
周嘉儀IG