41歲的楊卓娜入行17年大多在電視劇中飾演賢妻良母，不過最近她勇闖大銀幕，第一部戲就是三級片《G殺》，真係嚇咗大家一跳，更瞬即成為網上熱話，事關有網民發現她在預告中有一幕穿上性感束衣，大晒美好身材，睇到大家哇哇聲，仲有人不斷留言問：「會露幾多？會露幾多？」又有人大讚楊卓娜41歲都keep得咁好，封佢做「最索中女」！
《G殺》由恐怖大師邱禮濤監製、新晉導演李卓斌執導，是一部港產獵奇式電影。劇情講述有人被斬至身首異處，死狀慘烈，警方查明死者身份後，很快就鎖定六位嫌疑犯：當中包括家庭破碎後寂寞抑鬱的少女、大搞師生戀的名校老師、黑白通吃的暴力警察、隻身赴港求存卻屢遭歧視的南漂妓女、患有亞氏保加症的男生，以及終日閉門苦練琴藝的邊緣少年，每人都與死者有著複雜難解的恩怨情仇。電影以非線敘事抽絲剝繭、層層深入，在六人之中找出真兇。而每個人為了自己利益或掩蓋弱點更不斷編造謊言，令事實真相被扭曲。
雖然戲中飾演女主角的陳漢娜只得25歲，青春逼人，之前喺《殺破狼·貪狼》做古天樂個女，成功嶄露頭角，不過講到最受注目始終係楊卓娜，事關預告片中一幕谷胸拉腰封的戲份，惹人無限遐想，搞到楊卓娜都話嚇親老公：「佢都打咗個突，有朋友問係咪好多裸露鏡頭，仲有好多客戶睇完都好緊張打嚟問，問我係唔係拍三級片，其實因為戲裏面有好多暴力同色情，所以先被列做三級片。」不過講到今次喺戲中飾演乜嘢角色，佢就大賣關子，難怪搞到咁多網民都想知，今次佢到底有幾大膽啦！