膏蟹糯米飯

臨行在即，今晚將飛東非坦桑尼亞香料島嶼Zanzibar。朋友提早聖誕飯敘問想食乜？天氣冷最想吃火鍋。此外，第一心頭好是膏蟹糯米飯。註明：屯門三聖邨海鮮街「廣東名門」出品。膏蟹必選老友記Peter，名門對面楊合利揀手正蟹。

家中幾代吃海鮮都選去流浮山。三聖本來多去景靚光鮮「海天」，拍過黃淑儀《吾湯吾水》試過名門荔枝柴燒鵝後便心思思。老同學幾代老店楊合利位置對面，邊揀海鮮Peter提點：名門膏蟹糯米飯做得正……結果吃到一粒飯不剩！

腸胃時光隧道帶我回到廿年前高雄朋友家，意大利好友法南多外母為我們洗塵，弄一大盤「紅蟳米膏」，即粵菜膏蟹糯米飯，一面吃一面讚，過後念念不忘。此後吃遍寶島卻未碰上一家比伯母做得好的。如今竟在屯門尋得發夢吃到也會笑醒，源自福州的美味精製。

名門出品也非撞彩，幾年過去逢去必點，糯米香甜富咬勁，膏蟹鮮美，老想阻止自己只吃半碗起一碗止，見美味為食蟲難禁，但還未碰見半次令我失望的。出門50天，懷念！

（逢周三至五見報）