騎呢程至美

聯合醫院假程至美事件可能是近來最搞笑A1，事件教訓甚多，姚鈴學人做做「花生友」。

第一，靚仔靚女有着數，這個你我早已知，只是不知可緊要到可以憑此扮專業人士，在醫院掛上聽筒大搖大擺幫人看病無人干涉。不妨幻想一下，如果那人不是斯文靚仔、一表人才，成個電視劇中剛畢業那些實習醫生咁款，怎可以一再胡混過關。

第二，只要膽子夠大，面皮夠厚，其實騙人不是太困難。真的，你想頭愈大，構思愈誇張，超出正常人想像，其實你成功機會會愈高。正因人家想不到「咁嘅大話都編得出？」即使曾經有懷疑，都會怪自己多心，認為「哪會有人咁大膽」，即係扮醫生還不止，仲自在到請護士食嘢？

還有，反過來說，點都好，做人一定要保持警覺性，無論看來有多真實，或者美好得叫你根本不想懷疑，還是不應放低你的常識和智慧，尤其涉及的人愈多，責任感愈會因攤分而變薄，一心諗住如果有問題，隔籬那位自然會出聲，何用自己多事，結果，騙徒反而有機可乘。

姚鈴多心：如果假醫生今次要上庭打官司，經此實戰體驗，下次會唔會《壹號皇庭》余在春上身呢？

（本欄逢周二、四刊登）