如果......《城寨》命運能選擇

《城寨英雄》本周日大結局，劇情愈趨緊湊，昨晚花曼（王君馨飾）被追殺身亡，拳佬（陳展鵬飾）為救細妹更慘變盲佬。近日亦陸續有不少劇透，預告劇中主角相繼死傷，令很多觀眾大感心痛。如果，有機會改寫這些悲劇結局，一眾演員又會如何扭轉命運？

鑫鑫：嫁畀夏滿哥

我相信之前夏滿哥（李嘉飾）講，佢係真心愛鑫鑫，所以之後我有危險，再被爸爸賣身，佢會立即去救我。所以，我會希望跟住夏滿哥，好食好住；爸爸又改過，唔再爛賭就最好。不過，我覺得悲劇人物比較立體，觀眾容易投入，所以而家鑫鑫慘死先得到咁多人同情。

爛賭發 發達做城寨之王

我有八成嘅戲都係畀人打，係一隻不死嘅小強。如果有機會扭轉命運，我要做城寨話事人。因為同鄉會已經被打敗，咁我賭錢發咗達，就返嚟管晒「黃賭毒」。雖然這部戲大部分角色都是悲劇人物，但容易被觀眾記住，這樣才是劇集的吸引之處。

楊老闆 不改命運更入心

唔想改變任何一個角色嘅命運。雖然個個都好慘，又死又傷，但咁樣先好睇，悲情令觀眾嘅記憶深刻，更加入心。對於自己嘅命運都十五十六，雖然我嘅角色係一個壞人，做咁多衰嘢，去到最後都唔會有好下場，但如果觀眾可以同情我唔使死就最好。

畢得了 小智應該翻生

好多角色都好慘，譬如鑫鑫為咗佢爸爸而死，但佢係迫於無奈，無得選擇。不過智仔死係為咗大家，所以我要改變智仔嘅命運，唔想佢死。小智係一個英雄，佢企出嚟為佢嘅師兄弟、一個地方爭取正義，佢嗰句「強者係為咗保護弱者而存在」，真係好感動。

花曼 想享受甜蜜愛情

花曼為咗報仇，殺咗好多人，最後佢都得到佢應得嘅下場。但我唔想咁快死，希望享受多一陣愛情嘅滋潤，花曼同牙佬（袁偉豪飾）嘅甜蜜時光太短啦。

撰文：陳子楠

協力：杜明欣

編輯：黃寶恩

攝影：Lego

設計：梁政敏