不能說私己

「老婆，朋友話我搵得多，至可以退休。」

「老公，同佢講你使得少，至可以退休。」

老竇老母節儉成家，道理簡單，大部分人執迷不悟一嚿飯，我十歲就已經明白。問題係，使得少，都要使，斗零都要啩，問題咁就真係大喇。點解？

喺好多人眼中，我表面算係事業有成，內裏其實「一窮二白」。由結婚嗰日開始，深明家庭幸福法門，反對財政獨立，收入一分一毫，通通存入夫婦聯名戶口，老婆大人個個月攞剩零頭，夠我過「富裕」生活，隨時可以喺街邊篤串魚蛋。

三十年來，家用卡數食飯埋單，儲蓄投資置業，大人一腳踢，幾辛苦呀，我闊佬懶理，逍遙快活，習慣成自然，享受「無產階級」銜頭，就算有一日，人又老，乜乜又走佬，都符合申請綜援公屋資格，肯定天無絕人之路。

「退休」翻天覆地，無斗零收入，伸手板問大人度水，好似唔係咁好，大人叫我放心，遲啲畀X萬我傍身。為求穩陣，舊年底鼓起勇氣，靜雞雞，個個月攞走一萬幾千蚊，男人模仿女人，收收埋埋不能說的私己，偷雞摸狗原來有啲快感。爽！

神不知鬼不覺，諗住萬無一失，點知上星期，大人一邊睇韓劇，一邊輕描淡寫：

「收到綜合銀行月結單。」「哦。」

「私人儲蓄戶口有啲錢喎？」「……」

「好學唔學，學人收埋私己錢？」「……」

「你賺緊外快，唔使X萬傍身啦。」「……」

夫妻可唔可以緣定今生，最緊要老公誠實，若要大人不知，除非己莫為。𠵱家私己錢又無，大嚿錢又攞唔到，「退休」漫漫長路，我應該點做？

（本欄逢周五刊登）