反黑英雄丨袁偉豪認大叔拍劇辛苦摧殘狀態 感激囝囝來臨心情開懷：豁然好多

袁偉豪在《反黑英雄》中飾演一個大反派，冷血殺人兼壞事做盡，跟過往「警察專業戶」的形象大所不同。其中一幕被內地網民截圖笑嘲有肚腩，袁偉豪即時回應對方否認此事，他稱近兩年當上爸爸已經開懷得多，不再介意被嘲「斷崖式衰老」，只在乎留言不是事實，希望大家多欣賞演員背後的付出。

{{hket:ul-video id="10953"}}{{/hket:ul-video}}

{{hket:inline-image name="DSC08662.jpg"}}{{/hket:inline-image}}

{{hket:inline-image name="DSC08660.jpg"}}{{/hket:inline-image}}

{{hket:inline-image name="DSC08652.jpg"}}{{/hket:inline-image}}

袁偉豪主演的《反黑英雄》收視報捷，他感恩劇集受到關注，他坦言拍攝期間同時拍《法證先鋒VI》，相當不容易。「狀態係準備好，但開拍咗之後保唔保持到個狀態到尾呢？或者係咪從頭到尾都保持到高峰呢？對於網民評語，其實我睇化晒，我淨係介意佢哋講嘅唔係事實，唔好誣蔑我，我咁努力健身操肌，又捱兩組劇集，又為角色減食，幾日都冇覺好瞓。其中一場戲，氣溫五度我哋喺尖東海旁吹風，仲要跳落水，唔小心飲咗海水，搞到第日即病，又發燒又嘔。」他表示雖然生病，但仍然要繼續拍攝，在觀塘工業區拍攝一輪槍戰，他說：「我帶張凳喺個工業大廈看更亭瑟縮一角，一路發緊燒等埋位，帶一壺暖水傍身就瞓，冇人理呀喇，做演員就係咁，這樣情況之下點可能時刻保持住咁靚仔？希望大家諒解，我哋都係人，唔係機器，希望大家唔好咁苛刻，唔好雞蛋裡挑骨頭，有時真係會好心傷。」

由昔日的校草，到「香港先生」冠軍，近年卻被冠上「斷崖式衰老」的形容詞，袁偉豪坦言早已看化，他笑言跟同屆校草陳少邦合作，開工時一齊食飯重聚非常開心，「師兄曾經係我偶像，當年佢喺籃球場啲雄風英姿好勁，中一一返學就睇佢喺球場表演，後來惺惺相惜，仲跟佢學打籃球，大家一齊成長。26年前，大家年少輕狂參加校草選舉，而家各自有家室仔女，雖然保養得好好，不過睇得出大家有老態，五勞七傷，咁多年之後大家都喺呢一行發展，仍然坐低傾吓偈，我覺得好感恩。」

{{hket:inline-image name="DSC08643.jpg"}}{{/hket:inline-image}}

{{hket:inline-image name="20240620223350_162b5d9b4bd4ed48a52e8b83ad5225da08fa2372.jpg"}}{{/hket:inline-image}}

{{hket:inline-image name="bba.jpg"}}{{/hket:inline-image}}

能夠豁然面對網上負評，袁偉豪認為最大的改變是當上爸爸，「呢兩年我開心好多，因為有小朋友，一個新生命來臨係好值得感恩嘅事，我會好好珍惜同愛護佢，睇住佢每日成長有改變，慢慢識得叫爸爸、識得爬行、識得嘗試企起身，當全部焦點放晒佢身上，人就自然豁然啲！」他笑言除了工作外，幾乎所有時間都留給囝囝袁晞祐，只會趁囝囝睡覺時間才會約朋友食飯，凡事都會先考量家庭生活。問到會否「要仔唔要乸」忽略太太張寶兒？袁偉豪笑言：「啱啱相反，阿媽錫晒個仔，個仔取代咗我喺寶兒心目中嘅位置！我有時都會呷乾醋，怨老婆好耐冇理我，哈哈！其實我唔係想求關注，只係唔想佢太勞心勞力喺個仔身上而忽略自己身體，偶然都顧吓我啦！」他表示有意將多添一個小朋友，希望將來湊成「好」字，他笑稱到時候可能風水輪流轉，輪到寶兒求他的關注。​​​

採訪：楊安莉
攝影：何家賢
場地：Velo Italian Bar & Grill