才女卓韻芝將於今年七月自編自導自演獨腳戲《芝姐災難大全》，故事以阿芝一次經歷生死的旅行為靈感，經歷中女離婚的她，決心在人生到了一半的年紀，尋回自己的快樂，贏回自己人生。回望過去，阿芝無悔，就連當年企圖自殺的憾事，她亦大大方方放到獨腳戲中，自己笑自己，才是真正的克服過去。
同場加映：神耆小子丨鄭則士稱人紅未必係強籲保持初心 慶幸能變老：下部劇先係我嘅高峰
{{hket:ul-video id="10720"}}{{/hket:ul-video}}
卓韻芝與從事電影美術的梁子賢前年結束4年婚姻，當時阿芝出走冰島睇火山爆發，誰知意外頻生，更經歷死過翻生！阿芝將經歷化為靈感，以自身故事反思人生。阿芝說：「（今次旅程）我執番條命，回望時覺得好搞笑，喺當中反省自己，包括離婚、事業到整個人嘅成長，然後重啟人生。人都係衰格，順風順水嗰陣唔會自我反省，總係有不如意事發生先問點解。」阿芝覺得，到了30多40歲，人生差不多去到一半：「當生命喺面前掠過，原來要答自己一個最重要、最基礎的問題：我快唔快樂？我有冇做啲嘢去追尋自己嘅快樂、回答自己嘅快樂呢？」
決心離婚，阿芝認為最需要勇氣的，是怎樣才能令對方不要太傷心。「可能我比較幸運，我哋對對方好有禮貌，我喺度諗點講好呢，點樣先唔會傷害佢？但呢啲都係多餘，因為一定會傷心，所以點處理最緊要，先彰顯到一個人嘅特質同EQ。我哋盡量用最成熟嘅方法，唔使去Facebook鬧對方，和睦地繼續相處。我哋依家係好好嘅朋友，有湯會預埋佢嗰隻。」
說來輕鬆，但阿芝由決定離婚開始，卻經歷了前所未有的傷心：「嗰種傷心唔係流淚，係好似有幾年消失咗咁樣，嗰種感覺好恐怖，好似過緊『一個人的COVID』。」她希望藉獨腳戲講述自身故事，令觀眾也回看自己人生，「每個人喺生命中都有憾事，可能係婚姻唔如意，可能係同家人分隔異地，可能係生意失敗…但點樣喺呢啲憾事中，畀機會自己去贏番自己人生？」她希望告訴觀眾，贏回人生第一步，就是學習快樂：「快樂同學樂器、書法、烹飪一樣，工多藝熟，慢慢練習畀自己多啲快樂嘅機會，好似我90幾歲嘅阿婆咁，真正活在當下，唔去擔憂聽日，係快樂嘅人辦，亦係我嘅騷好重要嘅內容之一。」
阿芝人生最大憾事，是媽媽死得太早。「好唔抵，因為媽咪唔可以見到我成長，如果佢長命啲，我就可以同佢share多啲話題，但佢等唔到，呢個最遺憾。」2006年，阿芝因母親病逝大受打擊，企圖自殺；十年後，阿芝曾撰文談及當年自殺原因，原來當年母親病重，器官功能逐一關機，她為母親下了不急救的決定，但後來覺得或許媽媽有救，令她自覺成了罪人，思念加上內疚，想不開而做傻事。回望過去，阿芝沒有後悔：「好多嘢畀我再揀，我幾肯定所有嘢我都一樣咁決定，因為嗰刻係真心嘅。事實上亦冇得後悔，因為事情發生咗，你知道結果，覺得唔好先會後悔。當刻問心，係咪全心全意相信呢個決定係最好，如果係，then do it。」
近年本港自殺事件頻生，有不少輕生者更相當年輕，阿芝說：「上年見到好多唔開心嘅事，望見呢啲case，好後生、好靚或者有錢，乜都有齊，都放棄自己生命…雖然呢樣唔係我開騷嘅原因，但寫（劇本）嘅時候，都寫到關於生命，點樣同自己生命過唔去，點樣去愛惜生命多啲，以娛樂大家嘅形式，嘗試喺黑暗笑話中，得到人生真正領悟。」
阿芝連自己企圖自殺的過去，也拿出來自嘲一番。「一定會（放進獨腳戲），因為涉及生死，而今次旅程我亦差啲死，所以有諗番起。我好開心嘅係，若干年後，佢（企圖自殺）變成差唔多成個騷最重要嘅一個笑話，人生一啲憾事，最後成就最完美嘅笑話。」雖然老套，但時間真的是最好朋友：「若干年後發現自己笑得出，識得自嘲；有時候做訪問，遇過有記者好尷尬咁問『嗰件事』，但喺我世界我可以好直接講：『我企圖自殺呀，好樣衰呀』…其實我已經過咗。時間令人慢慢成長，從中領悟、回望，呢件事根本就係好笑，去到呢個騷，直情值得攞出嚟笑。相信時間，如果依家覺得好難受，忍多一陣，因為真係time can heal。」
撰文：李潔盈
攝影：何家賢
髮型：Marvin@shhh_group
場地提供：Little Tai Hang @littletaihang