馮盈盈否認為嫁豪門進修碩士 望成出色女性：提升修為最重要

馮盈盈近在社交平台拍片分享自己的讀書心得，態度斯文淡定而且充滿正能量，跟多年前《#後生仔傾吓偈》多嘴兼言論出位的她截然不同，不少網民估計她要嫁入豪門修心養性，亦有人認為她被公司雪藏後變乖。面對多方面的揣測，盈盈開腔稱一切改變源自於初衷。

{{hket:ul-video id="10669"}}{{/hket:ul-video}}

馮盈盈近年無論在演戲或是待人處事上，都有很大的轉變，引起網民們無限幻想，猜測到底她受到甚麼刺激。其實盈盈為演好角色，特別自掏腰包花錢去學戲劇演出，亦學習咬字發音，無論是早前的《你不是她》還是最近的《逆天奇案2》都有不少進步，觀眾和網友們亦有目共睹。「入行已經第八年，呢段時間絕對有所成長，無論主角定配角，對我嚟講冇分別，最緊要感染到觀眾。大家都知，主持界係我嘅舒適區，但做人唔能夠永遠做舒適安穩嘅事，演戲一直好有挑戰性，所以我有搵方法拜師下苦功。至於好多人問以前大癲大肺個馮盈盈去咗邊呢？其實同我熟絡嘅家人同朋友都知，私底下我說話真係唔多，同鏡頭前反差好大，係近年心態上放鬆咗，又有足夠自信去表現自己，將大家睇唔到嘅一面展示出嚟。」

{{hket:inline-image name="DSC01337.jpg"}}{{/hket:inline-image}}

{{hket:inline-image name="DSC01333.jpg"}}{{/hket:inline-image}}

盈盈積極自我增值，半工讀完成碩士學位，又完成特許金融分析師CFA的課程，反被猜測是為入豪門而鋪路，「麥玲玲講過入豪門要有碩士學歷，但唔等於讀完碩士就可以入豪門，如果係真，就周圍都豪門啦！當初突然決定去進修，真係為咗圓心願，當年選美報名嘅時候，我已經報讀咗英國大學讀碩士，但機緣巧合加入娛樂圈，讀書就先擱置。好多人覺得半工讀好辛苦，我啱啱相反，讀書係好放鬆抒壓。」30歲來臨之前，盈盈完成碩士課程成為人生一個里程碑，至於人生的下一步，盈盈否認結婚，「關於尋找愛情方面，我已經有想法，未來兩年絕對唔會拍拖，就算任何追求者或合適對象都唔會發展，想畀時間畀自己成長，唔怕遲，兩年後順利拍拖的話，35歲前生育仲唔使做高齡產婦，冇問題！（唔羨慕麥明詩？）佢今年都33歲啦，搵到愛佢嘅人，又擁有自己事業，絕對係完美幸福嘅時間，我覺得自己太早結婚未必好事，慢慢規劃啦！」

盈盈在IG拍片主動分享讀書心得，她坦言起初擔心跟藝人身分不太關聯，沒想到最終獲得不少正面回應，特別是家長們知道如何教小朋友去讀書，「初心係自己都係學生，只係將學到嘅嘢同大家分享，特別係自我成長、時間管理等等，令自己心靈上更加正面同積極。我覺得而家社會嘅女性，無論咩年齡、咩人生階段都好，只要明白內在美最重要，並且願意提升自己修練同修為，都會成為一位出色嘅女性！」

攝影：何家賢
撰文：楊安莉