中年好聲音2丨譚輝智稚氣舊照曝光差啲做足球員 爆仙氣老婆女追男貪圖佢美色？

《中年好聲音2》人氣王譚輝智獲得亞軍之後，受歡迎程度有增無減，早前正式成立粉絲會「FC Club」，他預告將於6月舉辦首次的粉絲見面會，跟大家正式聚一聚。而輝智昨晚在「輕鬆啲」YouTube直播節目中，成為主角被兄弟們「拷問」背景，除了分享自己讀書時代的照片外，更大爆他跟仙氣太太的相識過程。

同場加映：打天下2│AK即學即打動作比上輯華麗 Tiger武術底子身手獲導演讚賞

{{hket:ul-video id="10486"}}{{/hket:ul-video}}

{{hket:inline-image name="fc12.jpg"}}{{/hket:inline-image}}

{{hket:inline-image name="fc11.jpg"}}{{/hket:inline-image}}

{{hket:inline-image name="fc7.jpg"}}{{/hket:inline-image}}

「輕鬆啲」由《中年好聲音2》參賽者譚輝智、劉威煌、顏米羔、王嘉明、甘永傑、梁思傑、梁浩賢和節目導演潘文龍（龍導）成立，每日都會開直播，逢星期四都會有較長的節目，與網友傾偈唱歌交流。昨晚輪到輝智做主角，他們率先分享輝智年輕時代的照片，「FC」粉絲們已經迷妹上身，大讚他靚仔有型又玩得，相中見他的朋友都是外籍人士，原來他11歲已經獲家人安排到英國讀書，他說：「喺香港讀得唔好所以去英國讀，當時我同表哥好Friend，表哥過咗去一年，我都心郁郁，不過得我自己一丁友，諗住過去都係玩，於是我同我阿哥猜包剪揼，我輸咗所以去，屋企人Budget有限，只可以送一個去讀，就係我。」輝智表示當時去Kent讀書，荒山野嶺的一所學校寄宿，雖然跟表哥同一間學校，但兩人之間不可以講中文，「我唔識英文，但又唔畀我講中文，好彩冇遇到校園欺凌，不過其實唔理我已經係欺凌，頭幾個月真係日日喊，我每日打電話畀媽咪叫佢畀我返香港，應承佢返躩會畀心機讀書，但當然佢冇理我啦！」他隨後熱愛運動，透過運動認識更多朋友，更自爆幾乎成為足球員，「我踢波真係有天份，都幾勁，係少少天才嗰種，當年有球探去學校搵青訓成員，13、14歲我差啲入咗韋斯咸青年軍，因為我跑得好快！」輝智坦言大學修讀廣告設計，當時有玩樂隊，當時跟年紀比他大的哥哥們一齊玩做主音，他形容當時表演甚至去到「恥辱」級數，直至畢業返學後，因爸爸熱愛唱歌，他才在家中唱卡拉OK，他說：「我堂哥堂姐全部唱歌都好勁，成個家族都好有表演慾，新年團拜係會有Rundown大家輪流唱歌。」

提到輝智跟初初比賽的時候相比，性格開朗甚多，將原本的風趣搞鬼性格表露無遺，他表示：「之前好驚講錯嘢，因為我成日唔經大腦，有Feel就去，而家覺得做番自己講錯咪講錯囉！」至於問到跟太太的相識，輝智指兩人經朋友介紹，相識一年才拍拖，他望住鏡頭外的太太話：「我記得呀2014年吖嘛！（邊個追邊個？）佢話係我追佢，仲話追得好勁，但其實佢都畀幾重signal我。我有次去打波，佢本身唔應該嚟呀嘛，唔知點解又喺度，遞支寶礦力畀我，成隊波都冇，得我有！佢係鍾意我靚仔！」此時全場兄弟都起哄尖叫，不過隨後笑笑口預告今晚被趕出家門，要到梁浩賢屋企暫住，又笑太太離場是準備買玻璃，要他吞玻璃謝罪。兄弟們打算幫口讚譚太靚女仙氣「打圓場」，沒想到輝智續言：「唉，家家有本難念的經，仙女呢個朵，呢期佢個人飄到呢...成個人都飄飄然，著衫有少少唔同咗，我就一樣，佢落樓下食個粉都化番個妝。」

{{hket:inline-image name="FAI8_600.jpg"}}{{/hket:inline-image}}

{{hket:inline-image name="20240327234638_2e93e22dfa0188e4880fc72ef3f5065bc23558ed_600_600.jpg"}}{{/hket:inline-image}}

{{hket:inline-image name="yhhh_600_600.jpg"}}{{/hket:inline-image}}

為免輝智有生命危機，兄弟們立即轉換話題，跟輝智玩快問快答。輝智原來鍾意藍色，因年紀大坐不定怕坐長途飛機，偶像有「似自己」的李安納度、周星馳和張學友，不過他就未有回應網友追問他戶口有幾多錢，但聽到大家建議他跟爸爸譚握籌合唱，他說：「我一定得，睇佢啦，我哋今日傾過偈，原來咁耐以來佢都未試過同我合唱，一次都冇！」輝智原來是無辣不歡的人，參加過不少食辣的比賽，而最搞笑是大家問輝智是否識得下廚，他說：「煮嘢食其實我係有天份，我覺得我係識，只不過係未試，除咗煮麵之外，都冇下過廚，如果我去學，我係會勁！」睇到輝智不知哪來的自信，一眾兄弟都笑到趴地。至於一向對著衫品味有執著的他，被重提車婉婉笑他似地盤工人的打扮時，輝智說：「件格仔衫我係特登買呀，諗住冇得輸，點知...佢講完我而家都唔敢再著。」

{{hket:inline-image name="Sna.jpg"}}{{/hket:inline-image}}

撰文：娛樂組