中年好聲音2丨顏米羔離婚投資失利陷中年迷失 認任性放手一搏：為媽媽爭番啖氣

顏米羔在《中年好聲音2》得到季軍，節目後第一時間落台與觀眾席上的媽媽緊緊相擁，大男孩在女人圈中成長，他自認太任性愧對媽媽，今次比賽終於可以為媽媽爭口氣。經歷過工作室虧損、婚姻破裂等等，顏米羔的中年一度陷入迷失的狀態，慶幸是自覺不妥當向朋友求助，最終透過比賽重拾人生。

{{hket:ul-video id="10464"}}{{/hket:ul-video}}

長達九個月的比賽，顏米羔形容感覺像發夢一樣，猶幸自己不怕被人嘲笑，無悔追夢，而比賽像人生書本一樣，無論寫成如何，都要揭過全新一頁。「比賽之後瞓醒想起四個字重新出發，亦係從心出發，因為我發覺原來用心演出係會有人被感動，佢哋將情感投射喺我身上，令我好似幫緊人發聲咁，大家叫我加油爭氣，我都好想為佢哋做啲嘢！」

{{hket:inline-image name="DSC01045.jpg"}}{{/hket:inline-image}}

{{hket:inline-image name="DSC01050.jpg"}}{{/hket:inline-image}}

{{hket:inline-image name="DSC01042.jpg"}}{{/hket:inline-image}}

中年好聲音2丨顏米羔找數真漢子病住浸浴直播 湧過千人睇贏「人氣王」譚輝智【下一頁】

其實米羔不算素人，小時候跟同姓的顏志恒一樣是「浴室歌王」，讀書時代參加過不同類型的歌唱比賽，直至畢業後入行做攝影師，半隻腳踩入娛樂圈。「讀緊中二有人想簽我，個個同學都好雀躍，但我真係冇發明星夢，怕佢呃我，屋企環境又唔係好，而且得十幾歲，當年紅緊係張國榮、譚詠麟同四大天王喎，點可能？所以我放棄咗，到我廿幾歲再贏比賽，當時Twins出嚟喇，我呢款又唔三唔四嘅年紀又大過龍，好似生不逢時咁，心酸酸想做，但真係有包袱。」直至《中年好聲音2》，他笑言「中年」兩字是包袱亦是一份安慰，「中年會被人笑老悈悈，成班老坑出嚟唱歌，但其實咪又係同番以前嗰班人一齊玩，唔使怕後浪又唔覺得資源分配咩問題，唔使擔心，大家都有家室，大家都有經歷，大家都有包袱，大家都受過傷，來吧！」

比賽過程漫長，顏米羔坦言能夠撐到最後的參賽者都是較自由身工作的人，九個月期間他都沒辦法接拍攝的工作，慘失六位數字，「中年人邊有咁多時間燒？好多參賽者請唔到咁多假，之後返工被人反眼，大家都好痛苦，所以我希望網友們以歌論歌，但唔好去評論佢哋個人，因為永遠唔會知道人哋背後面對緊啲咩。」他感激媽媽和家人就算心裡擔心，仍然全力支持，所以得獎當晚他衝落台攬實媽媽不斷獻吻，他說：「我好鍾意阿媽，咁多年真係好委屈，因為佢鄉下人，成世人因為冇錢所以冇機會讀書，早結婚生咗四個小朋友，三個家姐加我，成世人就係照顧細路。我細個會怪佢成日唔喺屋企，長大就明白佢因為要搵錢養家。屋邨仔細個冇人陪，咪自己諗嘢玩，執到幾粒波子就諗點玩，長大之後冇出色走去搞藝術，唔係藝術一定冇出色，只係我好衰唔衰冇出頭。我老竇成日話我虎頭蛇尾、吊兒郎當，怕我三分鐘熱度，就係因為佢呢句說話，我就做一世藝術畀你睇！」父母離異多年，顏米羔在一次的人生課程中跟離異的爸爸詳談和解，冰釋前嫌亦解開心結。

中年好聲音丨顏米羔組男團開直播爆感情狀況 「金主」譚輝智震驚：拎番利是嚟【下一頁】

{{hket:inline-image name="DSC01059.jpg"}}{{/hket:inline-image}}

{{hket:inline-image name="DSC01066.jpg"}}{{/hket:inline-image}}

{{hket:inline-image name="DSC01082.jpg"}}{{/hket:inline-image}}

{{hket:inline-image name="DSC01086.jpg"}}{{/hket:inline-image}}

顏米羔跟前妻是中學同學，前後腳考入演藝學院，不過讀到半途就放棄，「任性，當時覺得藝術唔係咁樣，當時屋企人鬧爆，話我唔正經讀埋佢，屋企供我供得好辛苦，我仲好任性咁講：『仲有一年幾，我同你慳番唔少啦！』」後來，他向家姐借幾萬蚊跟朋友開製作公司，購買器材接Job，從此就不再問家人拿零用錢。「其實唔係好有面返屋企，咁大個人錢就冇剩呀喇，但叫做死唔去。返親屋企都好大壓力，我真係好多謝三個家姐，冇佢哋我根本冇得任性去做藝術，佢哋撐住屋企但我係冇貢獻，做啲懶型自吹自擂嘅嘢，但其實唔賺大錢。」他坦言媽媽小時候喜歡做大戲，可惜因著生活被逼放棄，顏米羔都放在眼裡，他忍不住流下男兒淚，「我離婚之後，媽媽好擔心我，怕我一支公，真係衰啲講死咗都冇人知。我覺得而家幾叻仔，好似代我阿媽做啲嘢，我好多謝佢，但幾十歲人仲要佢擔心，我就係咁任性，好彩有少少成績，如果少少成績都冇，我仲難過。唔係想賣慘，我可以將個榮譽畀番阿媽。」

人到中年，顏米羔承認一度陷入迷茫之中，這幾年間突然離婚失去廿幾年感情，事業上又工作室蝕大筆錢，令他感覺自己人生一團糟。「我會自我質疑，既然乜都唔如意，曾經有一刻喺後樓梯自認好似唔值得留喺世界上呼吸咁。」他坦言有感不妥當，主動找朋友傾訴，慢慢逐步重拾人生的腳步，加上朋友鼓勵他參加《中年好聲音2》，令他人生轉變。「比賽咪試囉，當畀自己發最後一次光囉！其實中年好，咩年紀都好，人生得一次，想贏就去面對，輸係冇問題，咩都可以重頭嚟過，一日仲喺度張開眼、有呼吸，又係新一日！」

{{hket:inline-image name="DSC01036.jpg"}}{{/hket:inline-image}}

{{hket:inline-image name="DSC01090.jpg"}}{{/hket:inline-image}}

{{hket:inline-image name="DSC01104.jpg"}}{{/hket:inline-image}}

撰文：楊安莉
攝影：何家賢