美斯訪港效應張家輝被召喚 與關詠荷婚照再度失落街頭？

阿根廷球王美斯今日隨其效力球隊國際邁亞密抵港，而佢新加盟嘅隊友蘇亞雷斯就係剛才出席記者會，現場人頭湧湧，能夠一睹球星們風采嘅機會實在係非常難得！而據知美斯現正係受傷患困擾，嚟緊04/02（星期日）香港隊對國際邁亞密嘅表演賽相信未必可以見到佢落場，但持票人士仍可以開場前睇到，歌手包括G.E.M.鄧紫棋、Anson Lo 盧瀚霆、姜濤及Gareth T湯令山嘅演出。

難得美斯訪港，唔少人都記起佢香港嘅「失散兄弟」張家輝！張家輝近年被網友指佢同美斯猶如餅印！2014年張家輝出席足球活動時，模仿對方眼神，似到十足十，相信佢嘅演技都有加乘！不過家輝曾表示唔係太熱愛足球，相信大家都唔會有機會見到佢哋「同場」喇！家輝亦留意網友話佢哋似，不過佢自己就覺得唔似，但美斯唔係只賣靚仔，有技術，Sell實力，就同佢一樣咁話。

{{hket:inline-image name="396903501_838242357843424_7854112382756460247_n.jpg"}}{{/hket:inline-image}}

無獨有偶，家輝個樣明明唔係太「大眾臉」，但今日網上又見到張家輝另一個「失散兄弟」，將婚照棄置於街市門外，引起網民熱烈討論。日前一名網民喺一個Facebook群組中post出兩張相，相中見到一張全新未開封、膠袋未拆、包相框角嘅紙皮都未搣嘅結婚相，孤獨咁樣被棄喺樂富街市嘅花槽旁。相片嘅style明顯有啲年份，似係90年代尾千禧年頭嘅風格，相中男子着全白禮服，女子着tube dress婚紗，二人於大自然中取景，男子從後抱住女子，二人都笑得好燦爛，相當溫馨。

唔少網民都話以為係張家輝同關詠荷，不過其實放大睇真啲就唔係太似，唔少人都為相中人嘅愛情感到惋惜，留言悼念：「情已逝～」、「逝去感情如何留得住。」、「一個令人悲傷嘅故事。」、「張相好似連掛都未掛過……」又有人好奇點解佢哋唔將容貌劃走或者剪走先棄置，依家咁掉就好似「公審」呢份曾經喺生命中出現嘅感情一樣，令人感到不勝欷歔。

張家輝與老婆關詠荷結婚21年，一向被譽為圈中的模範夫婦，由於二人形象恩愛，早年曾獲婚紗公司睇中邀拍婚紗廣告照片。2019年二人嘅婚紗照被棄於中環街頭。該張婚照同佢「失散兄弟」婚照拍攝手法如出一轍，設計同甫士都頗為懷舊，但兩人真情流露，構成一幅幸福畫面。婚照以金色畫框鑲嵌，人來人往都冇人理，後來經理人鍾珍回覆時表示係家輝好耐以前拍嘅廣告相，夫妻二人都唔知相片被棄置。

圖片來源：Facebook