吳浩康做地盤朝八晚五再煮飯教班 Chur到「爆肝」Yumiko被感動

現年40歲嘅吳浩康Deep近日為養家密密開地盤工，仲令佢得到唔少網民支持，大讚佢真男人、大丈夫能屈能伸。日前Deep拍片講佢呢年嘅生活同心路歷程，感動咗唔少藝人同網民，仲有唔少人因為咁而被佢「圈粉」！

同場加映：  中年好聲音2丨劉可曾為唱歌奔波累壞身心聲帶 參賽贏盡友情 望舊歌新唱永續傳奇

{{hket:ul-video id="9937"}}{{/hket:ul-video}}

Deep講到自己2023年嘅1月至11月都係一直「捱打」，因為通關之後好多人都唔留港，令佢原先嘅工作收入大減，跌到20年來新低點，難以維生。因為咁，佢開始返part time，朋友介紹下開始返「金屬棚架」行業，起初只係喺唔同地方做搭架工程，侈如亞博、醫院後山擋土牆，同中環海濱演唱會場地……4個月前佢更加加入地盤工人行列。

{{hket:inline-image name="43.JPG"}}{{/hket:inline-image}}

Deep一星期返3、4日地盤工，每日早上6點起身，8點返到地盤，到下午5點15收工；有時仲會煮埋晚餐畀老婆同仔仔先去教班教到晚上11點。Chur足17個鐘，Deep keep住呢個循環3個月，不過佢認為狀態依然係「捱打」。直到12月1日佢分享咗自己做「職安真漢子」嘅短片，得到前所未有咁多嘅支持：「再一次感謝大家，我客串嘅角色有人留意到；有人請我表演，有人願意睇我表演，；有一套引以為傲嘅電影上畫，又有一套客串嘅電視劇出街；平安夜有job，地盤有工開；仲有機會同老婆去馬來西亞做倒數show唞幾日。」

到最後，Deep講到自己已經捱到好殘，好驚自己就死，佢提到工友教佢好多嘢，仲教佢要好好護肝。原來，講到最後係一個護肝保健品廣告，不過Deep都表示自己仲會嘗試戒酒，都唔會盲目誇大護肝保健品功效，真係睇得舒服又抵讚。

唔少網民都話被佢感動到，就算係睇晒成個廣告都冇所謂，留言：「欣賞你係一個愛家庭為家人而努力嘅真男人。」、「呢個真係睇過最正嘅廣告，Deep加油呀！」、「呢個廣告一啲都唔反感，仲好感動。」就連佢好朋友鄭希怡（Yumiko）都留言：「好感動，原來係一個廣告。」Deep都有回應：「我真心㗎⋯⋯分享生活同時幫補生計，畀吓面。」可以話係2024年NO.1「有公關」嘅藝人，非常討喜！

Deep其實都即將於2月24日元宵節水上樂園AQUALAND舉行個人演唱會，早前一身工業風為個唱拍攝海報及宣傳片，表示：「其實冇諗過會發展得咁快，主辦佢地好錫我，覺得我屬於舞台，所以幫我搞呢次音樂會。我都好多年都冇舉行個人騷，今次唔會加太多新Idea，反而想保留歌曲原汁原味。」Deep仲話囝囝會入場支持，但唔會邀請佢上台做「嘉賓」：「唔會搵佢做嘉賓啦，佢仲咁細個！我都擔心佢會走嚟走去，如果唱唱吓突然扭計，我都唔知點算，唯有扮睇佢唔到，否則要抱住唱㗎喇。」

呢日Deep要爬上高台拍片唱歌，佢仲落手落腳裝拆欄杆，手法睇落好專業：「其實我都擔心有人誤會我做地盤係宣傳，有啲網民話我地盤唔駛做、行行企企，我都想問吓佢有冇呢啲筍工介紹！不過都唔理得太多啦，明我嘅人自然會明，唔洗解釋太多。今次呢個騷會送飛比啲地盤兄弟睇，因為平時都出生入死，所以想邀請佢地嚟睇。佢哋（工友）揀啲歌好大熱，一定會唱㗎喇。依家做多咗工程，創意反而唔會多咗，而係怕啲工友太辛苦，唔好搞咁多嘢，最終得翻兩條鐵喺度。」

Deep勤力愛家形象，難免被外界拎嚟同佢好友張致恒作比較，佢表示有留意相關消息，但就不願多講：「作為佢嘅兄弟，大部分人比佢呃過嘅嘢，我都畀佢呃過㗎喇，但係做朋友就唔會多講，我只想畀佢嘅家庭同成長留番啲空間。」

圖片來源：Instagram