晴報VIP｜莫樹錦初中成績曳 收復失地靠一招 「幸福因我不覺工作是工作！」

終於有機會和被公認的「腫瘤學巨人」、「腫瘤學的傳奇」莫樹錦教授暢談，十分榮幸。行醫40年的莫教授身兼多職，他是香港中文大學醫學院腫瘤學系系主任兼李樹芬醫學基金腫瘤學教授，同時擔任和黃醫藥獨立非執行董事、阿斯利康的獨立非執行董事，以及多間醫療機構的董事會成員，其忙碌指數可想而知。這位型男怎樣找到工作與生活的平衡，絕對值得大家學習。

{{hket:inline-image name="2.jpeg"}}{{/hket:inline-image}}

{{hket:inline-image name="IMG_3162.jpg"}}{{/hket:inline-image}}

「每個人都有同樣咁多嘅時間，最主要一點就係你點樣睇你嘅工作，我覺得我自己係幸福嘅，因為我從來唔覺得我嘅工作係工作嚟，我要做嘅嘢，我就會去做好佢，而我做嘅過程係開心嘅，譬如今日係工作定係娛樂呢？我又唔係好分得到，能夠同大家傾傾香港科研嘅發展，講講香港一啲科研嘅成就，係一件開心嘅事情。」他說。

說到香港科研的成就，最近有新藥成功通過美國食品及藥物管理局（FDA）審批，成為於美國獲批、中國研發，適用於實體腫瘤的小分子抗癌藥物，為腸癌患者帶來新的治療選擇。作為科研團隊一份子，莫教授強調不能奪去研究人員的功勞，但他每天努力為患者延長生存率的付出，乃不爭的事實。

他行醫多年，認為每一個病人都有自己的故事，「當中有戲劇性嘅故事，但唔代表唔戲劇性嘅，就唔係故事，所以我從來唔喺媒體上標記任何一個病人嘅故事，我哋作為醫生，就係陪病人走一條路、同佢完成一個故事，而每一個故事都有佢嘅價值。」

變身「Super Mario」追求快樂

莫教授這位「腫瘤學的傳奇」比任何人都忙碌，但仍然keep到好體魄好外型，而且好有型，打扮時尚又有品味。他笑著表示：「係個人嘅喜好嚟啫，我有一啲基本嘅做人原則，就係做令自己開心嘅事，著件衫覺得好睇，感到好開心咪得囉；食嘅嘢覺得好味，自己開心咪得囉，所以追求快樂係我人生其中一個方向，我喺不同嘅訪問中都講過自己係Super Mario，一路攞金幣，嗰啲金幣就係快樂。喺生命上唔同嘅點滴之中，我都嘗試去搵快樂，然後袋落袋，袋咗落袋咪開心啲囉！」

我問：「抗壓能力方面你屬於先天定後天？」

他說：「先天定後天？我諗都一定係兩者。我媽媽係個好樂天嘅人，個仔咁曳，佢都算啦、由得你啦！」

曳？我眼神充滿質疑。

「我中三先至開始認真讀書！」莫教授自爆小時候讀書成績不佳：「我F.1、 F.2考試名次屬全班最低嗰25%，F.3 突然努力嘅轉捩點係 π（圓周率，Pi）。當時我讀聖士提反書院寄宿學校，成日同同學打波、鬥波咁，突然有一日，我哋發現數學書裡面個 π 3.14159265358979323846...於是大家就鬥記性，睇下記得幾多個數字、鬥鬥記到幾長，同學之間第一次喺學習上有競爭！跟住鬥下鬥下，就開始鬥背書，Geography第5頁第4行講啲咩呢，發現除咗自己嘅記性唔錯之外，仲發覺書本內容都幾有趣，會諗方法將啲資料記喺腦海入面，對讀書越嚟越感興趣。」

遇困難緊握核心價值

找到令自己快樂的方法，也許就是莫樹錦教授成功的原因之一。我們遇到困難、遇到挫折，又應該如何面對？

莫教授和各位讀者分享見解：「香港一向都好成功，我哋而家遭遇一啲困難，喺呢個過程之中，的而且確見到有好多唔同嘅意見，都有好多唔同嘅衝突，我想最主要有兩方面，第一就係Take it easy man，人生其實唔係在乎呢一刻，而家你所面對嘅困難，或者我同你中間嘅衝突、或者任何嘅衝突，其實睇番轉頭都係好小嘅事情，你只要退後一步，唏，無所謂嘅！所以我對好多事情，我個人嚟講係無所謂嘅，蝕咗錢，蝕囉！你唔鍾意我，唔鍾意囉！第二，只要你緊握幾樣核心價值，對我嚟講核心價值好簡單嘅啫，就係家人、健康，其他嘅真係唔重要。所以當你能夠咁樣諗、捉緊咗你嘅健康，捉緊咗你嘅家人，其他啲都係Bonus，有就有、無就無，咁樣嘅時候大家都開心啲，香港亦都可能因為咁，能夠更加成功。」

撰文：陳小芝

編輯：陳潔雯

攝影：陳健珊

{{hket:inline-image name="VIP_600.jpeg"}}{{/hket:inline-image}}

立刻加入《晴報》WhatsApp頻道，獲取最新娛樂、健康及著數資訊，仲有送禮活動！
【https://bit.ly/3RnCHkV】

 ↓U Lifestyle App睇盡《晴報》新聞資訊及自家節目↓
↓↓同步更新、更快更順↓↓
【免費下載】