TVB忠粉丨劉鑾雄笑《愛回家》女演員硬膠整容 睇《東張》有感以《武則天》喻繼承人

劉鑾雄今日召開記者會，澄清網上一啲失實報道，除咗維護番太太陳凱韻（甘比）、還老婆公道之外，仲多番激動狂數前女友呂麗君。言談間大劉有講到自己睇咗一啲TVB嘅節目，估唔到日理萬機嘅佢都享受「平民」娛樂。

劉鑾雄提到自己已經同前女友呂麗君冇直接聯絡，即使對方搵佢都唔會聽電話：「厚面皮搵我就冇，我有時搵仔女佢就一定喺隔籬聽。」佢表示自己一早已經分晒身家，而其中一個原因都係之前重病嘅時候前女友去到醫院「揖揖揚揚」：「佢見我唔死得就去醫院，我本身都唔想結婚，我要保障老婆即刻結婚。律師同我講劉生你分咗就冇（錢），我寧願睇錯我而家分畀嗰啲人，都唔想益嗰啲人。」

同場加映：中年好聲音｜曹敏寶事業愛情兩失陷情緒病低谷 靠老友走出陰霾：放下執念好重要

{{hket:ul-video id="9516"}}{{/hket:ul-video}}

劉鑾雄被問到前女友子女會唔會分到身家，佢就話驚分身家畀仔女，會畀前女友「食埋」。佢提到之前有睇《東張西望》留意到一單「平民爭產」案：「前排《東張西望》有個肥女人嫁四次，個仔公屋個title都畀佢嗒埋，同佢第四個老公結婚，我諗個四十幾歲肥媽冇男人會死。」《東張西望》7月時報一名女子為將第四段婚姻老公加名到公屋，於2020年聯絡從未一同生活嘅仔，要求簽署刪除公屋戶籍的文件，後來先揭發母親早於10年前借用兒子名義申請公屋，並取得單位居住。估唔到大劉都會得到啟發。

{{hket:inline-image name="3.jpeg"}}{{/hket:inline-image}}

劉鑾雄又指自己信任太太：「我今日仲有say，因為甘比同三個仔女都聽我說話，如果我話呢個哥哥姐姐好合眼緣，我叫佢送一百萬、一千萬，佢一定照做，因為佢知啲錢係我辛苦賺番嚟。我遺囑一早分咗，我而家咩都冇，但我相信陳凱韻同我三個仔女都會照我意思做。」佢提到呂麗君胡亂投資，但就冇錢賺：「佢乜投資都有，話買倫敦物業賺都係作出嚟，佢講大話唔眨眼，出口成詩，仔女本身唔知，佢（呂麗君）好識洗腦。有個夥計退休我畀幾百萬，佢咁都『撻』呀，好多呢啲錢，一支牙膏、一張單claim三次，超級市場有人掉張單佢都執嚟claim，呢啲唔係我作出嚟，有假我7個仔女都養唔大。」被問到會唔會同前女友一對13歲女同18歲仔女同住，佢就表示要睇一對仔女意願。

大劉表示前女友「造謠」目的係打擊甘比，雖然甘比唔上心，但佢仍選擇開記招：「但我唔出嚟講有啲人會信。其實我忍好多次，太太覺得我使咩勞氣，講嘢都傷氣。我見咁多壞人，未見過咁X賤咁X壞，都係第一次。」被問到佢將來打算將事業王國畀邊個人接班，佢就以劇集《武則天》玄妙比喻：「范冰冰套《武則天》，初頭個老竇冇諗到個仔（太子）咁細個，個太監同佢講你仲有個細仔。佢有三個大仔，ABC做皇帝，三個都心狠手辣，其中一個做其餘都要死，個細仔做其餘就唔使死。問呢啲冇意思，唔一定大仔，我會講能者居之。」

大劉被問到平時有冇咩消遣，又話自己耐唔耐有睇《愛·回家之開心速遞》，閱女無數嘅佢評價入面其中一個女演員：「我見到有個角色，唔開名，硬膠到、肌肉實到唔識郁，你哋去睇邊個最似啦！男就好少咁硬膠，多數女啦，但人哋真係為咗搵食。」

圖片來源：資料圖片