ViuTV劇集《社內相親》將於11月27日首播，ViuTV今日（7日）假香港麗思卡爾頓酒店舉行盛大活動，大玩「社內」gimmick，邀請出席的廣告客戶及傳媒朋友化身公司員工，參與員工大會。霸道總裁盧瀚霆（Anson Lo）連同暖男秘書呂爵安（Edan）率領董事長爺爺羅家英，以及公司員工陳俞希、葛綽瑤、麥沛東登場；女主角陳漢娜則攜同千金閨密沈殷怡，與家人盧覓雪、歐陽偉豪、陳建博，以及型男主廚陳安立、主廚女友余潔滢、鄰居潘雲峰、閨密爸爸曹查理出場。演員之後逐一介紹角色，並分享拍攝趣事，又率先透露劇集必睇場口。
同場加映：馮德倫大讚Meme伯尷尬笑好過癮 自爆財政全權由老婆舒淇揸fit
當中曹查理久未於香港電視劇出現，問到今次與年輕人的合作，他笑言：「我同後生始終有代溝，差幾代…」他指原先有3至5日戲份，但返港後才被告知自己得一日拍，要由朝早八點拍到十二點，「佢話我貴，所以只可以拍一日，咁一日點拍？由日頭拍到晚上12點…但我人都返到嚟，可以點？我拎成喼衫去公司試，佢話有衫俾我著，我話我大把西裝，唔著佢嗰啲。」他指自己拍戲不嬲都出動私伙，指對方如果之後再補拍的話，只能搵他。
他又指最近與葉子楣見面，「呢幾日搵葉子楣出嚟，同我以前識嘅已經兩個人，佢頸下底全部一樣，頸上唔一樣，仲想搵佢拍電影，本身想拍笑片…（搵家英哥拍？）家英哥去大陸拍好辛苦…」一旁的家英哥亦說：「不行不行。」
家英哥在劇中演盧瀚霆的董事長爺爺，他指角色好鍾意食豬腸粉，飲豆漿。提到有一場要「打」孫仔，他就指：「係呀！因為佢唔聽話，因為我叫佢識女仔，佢係代替去相睇，搞到我好嬲，用棍去扑佢，好彩呂爵安揸袋去擋住，如果唔係扑穿佢個頭。」
至於Edan演暖男秘書，好少做溫文爾雅的角色，「做秘書都係我強項，好溫柔。第一次《全民造星》見嗰時花姐都話我係咁（花姐：冇咁嘅事）佢口硬，今次有機會展現溫柔嘅一面。」他又大讚Anson Lo好有型，「佢不嬲都好Chok，演霸道總裁係佢強項。」他又預告有show肌場口，Anson Lo則指一定有Sweet場面，「我屋企人一定睇，我爹哋係盲粉，不過佢同媽咪睇床戲會尷尬，會搵其他嘢做。」
立刻加入《晴報》WhatsApp頻道，獲取最新娛樂、健康及著數資訊，仲有送禮活動！
U Lifestyle App睇盡《晴報》新聞資訊及自家節目 ↓
↓↓同步更新、更快更順↓↓
撰文：娛樂組
圖片：大會提供