電影《白日之下》以真人真事改編殘疾老人院舍的事件，將新聞個案呈現在觀眾的眼前，林保怡、梁雍婷及余香凝分別飾演院長、智障女及記者的角色，三人均憑出色的演技獲入圍台灣《金馬獎》獎項提名。他們坦言拍攝時要擺脫理性，說服自己才能投入角色，期望今次電影能夠讓觀眾欣賞到香港演員的實力外，更喚起社會對這種議題的關注。
同場加映：
FINALLY搞舞台劇為阿冰甘願做配角 諗計博觀眾一笑：盡量唱得差啲
林保怡飾演的殘疾院舍「彩橋之家」院長章劍華，而梁雍婷飾演的小玲則是智障的院友，而飾演記者的余香凝為了深入調查報道殘疾院舍虐待老人和性侵院友的事件，不惜假扮一名長者的孫女混入其中。林保怡以往角色都非常正面，今次飾演大壞蛋院長，他表示：「其實從院長角度睇，佢覺得自己做得好好，政府唔做咪我做，如果我唔收留佢哋，佢哋瞓邊？係我畀個床位佢哋！」院長是一名弱視人士，保怡事前都有跟弱視人士見面，了解他們的生活和細節，再代入角色，他說：「好開心有朋友話我知，喺電影入面佢哋只見到章劍華，而見唔到林保怡。」
《白日之下》參展東京國際電影節 姜大衞讚臨時演員出色增說服力【下一頁】
梁雍婷首次跟林保怡合作，在院長和院友互動之中得到默契，梁雍婷說：「喺保怡哥身上學到好多嘢，其實戲入面有個頭掂頭嘅互動，就係保怡哥提起同姪仔會咁玩，所以我哋就試咗出嚟！」余香凝大讚梁雍婷非常投入角色，她說：「就算導演未嗌Action，我哋都互動緊玩緊，佢真係好代入到小女孩嘅心態，例如玩食頭髮或者貼貼紙，呢啲全部係我個女而家最鍾意做嘅嘢！」梁雍婷認為智障女不難演，難演在她看過新聞、看過劇本，難以掩飾心中的怒火，但偏偏角色小玲要完全洗走對這些事的判斷，享受當下。
林保怡指拍攝期間連望鏡都不太敢，因為內心很討厭這個人，要不斷說服自己院長是對的，直至拍攝完畢，跟導演簡君晉確定沒有補戲，他就立即把鬚剃走兼剪頭髮，很想盡快擺脫這個角色。余香凝坦言起初拍攝時，睇到林保怡的造型就頓時入戲，所以片場都不太喜歡跟他互動，「未結婚我會24小時投入角色入面，有時都好難抽離，但而家有咗小朋友，一收工返屋企就要做番媽媽，反而覺得幾好，可以令我片場更加投入，而收工就即刻放低晒角色入面沉重嘅嘢陪小朋友！」
白日之下︳黃妍獻出第一次為電影唱主題曲 「《日光漂白》係好夢幻嘅合作」【下一頁】
對於《白日之下》讓三人成功獲提名《金馬獎》，首次在演戲上獲得肯定的林保怡說：「我感覺已經得咗獎，做咗咁多年頭，心裡面已經好OK，（終於被認同？）遲咗囉！哈哈哈！講笑，每個人人生過程唔同，有啲人好早做童星就得獎，有啲人好遲，我冇乜所謂，最重要係觀眾識得選擇睇電影。」他坦言遇到今次機會絕對是緣份，事關兩年前收到劇本時，他因為檔期問題推卻，後來機會輾轉再次到他手上。而梁雍婷笑言對獎項沒有信心，十分期待出席《金馬獎》60周年的頒獎禮，順道去當地享受美食。
梁雍婷指今次電影題材雖然沉重，但正正是香港電影存在的重要性，希望留觀眾空間去思考，雖然如戲中對白所言，可能觀眾兩日後就忘記，但願能夠喚起大家對院舍的關心就已經足夠。余香凝最愛戲中的一句：「就算善冇善報，惡冇惡報，我仍然會選擇善良同公義。我希望電影畀到訊息大家就係唔好放棄希望，雖然電影最後好似好多嘢都未解決到，但唔代表永遠解決唔到，唔好放棄希望，做咗嘅一定會有佢價值。」
而林保怡大讚整部電影的演員都用上百二分努力，無論是胡楓、姜大衞、寶珮如還是由臨時演員飾演的院舍院友，全部都演技強勁，「我初初拍以為真係搵智障人士幫手，點知原來個臨時演員係演藝學院嘅同學，香港真係有好多好演員值得被大家睇到。」
髮型：Ken Hui @artifyLab（余香凝）、Oscar Ngan（梁雍婷）
化妝：Melody Chiu @melodychiumakeup（余香凝）、Deep Choi（梁雍婷）
服裝：Max Mara（余香凝）、 alice + olivia、Charles & Keith（梁雍婷）
場地：1881 Heritage
立刻加入《晴報》WhatsApp頻道，獲取最新娛樂、健康及著數資訊，仲有送禮活動！
【https://bit.ly/3RnCHkV】
U Lifestyle App睇盡《晴報》新聞資訊及自家節目 ↓
↓↓同步更新、更快更順↓↓
【免費下載】
撰文：娛樂組