香港樂隊RubberBand（RB）成軍14年，成員繆浩昌（6號）、馮庭正（阿正）、李兆偉（阿偉）和黎萬宏（泥鯭）創作歌曲陪伴大家度過不同時刻。經過疫情再面對移民潮，RB創作了專輯《Ciao》和舉行演唱會，以聚、散為主題。說了再見便會再見之後，社會進入新階段，他們就以《Juntos》的主題，跟大家攜手迎接未來。
同場加映：FINALLY搞舞台劇為阿冰甘願做配角 諗計博觀眾一笑：盡量唱得差啲
RB將會在今年12月24日至26日、12月30日至2024年1月1日，於九展舉行合共6場，名為《Juntos》的演唱會，跟大家歡度聖誕節，以及迎接2024年的來臨，亦會推出同名專輯。日前，他們一起接受《晴報》訪問，提到今次的主題，6號表示這是他們入行第10張專輯：「西班牙文一齊的意思，但我哋鍾意佢嘅解釋，一班人做一件事。」今次演唱會的舉行場地亦有特別意思，2009年RB正是在九展舉行首個音樂會，他們對這個場地都有特別的情意結，知道這個地方即將會重建，這一次走回圓點，來一個好好的道別。
泥鯭@RB公開寸姜濤要「言語治療」 似拎終身成就獎：修哥都講唔出【下一頁】
黃心穎同泥鯭拍住拖睇世界盃 陪謝茜嘉打邊爐齊撐摩洛哥入四強【下一頁】
2008年正式出道的RB，由原本5人變4人樂隊，他們14年來同喜同悲，一班人共同做過很多事，阿偉就最難忘首個音樂會演出，因當時經驗不足出錯不少：「當時出道1年左右，公司叫我哋咪做囉，我哋好緊張，而且又未Ready好，開騷前下畫綵排，出錯都數唔晒，畀Mark Lui（雷頌德）鬧到傻。」阿正就最難忘跟DJ謝茜嘉一起到西班牙拍攝旅遊節目，當時4人一起體驗當地出名的Turkish bath：「最記得係嗰次一齊沖涼，最近啲相又彈番出嚟。都唔明當時又會肯咁做，仲冇諗過推（工作），可能唔識呢啲。」泥鯭在旁笑謂：「好似啲女星唔識推。」
日對夜對，4個男人的感情都十分深厚，各有性格互補長短，每次出現問題，總會有其餘3個好兄弟在旁扶持。泥鯭謂：「最感動係每次埋班一齊寫歌，大家就好似困獸鬥，個個面口都唔好，因為都諗唔到嘢，都唔知會創作到啲乜嘢出嚟，但神奇地每次出嚟歌迷都好滿意。」最難得的是，大家都沒有因此而影響感情，而且多年來都目標一致。
泥鯭笑言大家都在互相「黑面」的日子成長，但這樣亦無損創作：「我哋真係會互相唔啋，冇人做和事佬喎，其實知道咁樣係好討厭，但係慢慢會諗，大家堅持嘅論點都有佢啱嘅地方，互相明白咗，時間就會幫到件事。」阿偉都認同，大家都朝著最大目標前進，相對地就已經不需計較自己小小的感受。
這麼多年來，尤其在經歷這幾年的社會變化後，RB各自在成長，阿偉覺得自己更懂得珍惜，因為疫情令像夾Band這樣的理所當然的事情也要停止；阿正就呻笨，認為應該趁之前幾年的空白期多進修。而泥鯭就變化較大，與黃心穎結婚成為人夫，不過就貫徹他一向作風，拒絕回答私人問題：「每個人都會喺唔同時間有唔同崗位，從整隊Band嘅角度嚟講，冇乜話轉變，都係Go with the flow（順其自然）。」之前曾經在社交平台出帖文，被指暗寸姜濤對MIRROR成員的一番話，而被鏡粉惡意抨擊，他現時盡量要自己放鬆：「我而家係Quit Social Media，可以唔Post唔講嘢，但唔等於無感覺，只係用第二個方法疏導自己。」
曾約定歌迷《未來見》的RB，去年舉行巡迴演唱會，走訪加拿大、荷蘭、英國、澳洲等地見已經移民的歌迷。對於朋友轉到其他地方新生活，6號表示曾經都難以面對：「我係好敏感嘅人，舊年面對好多好朋友離別，我過唔到呢關，每次去食飯Farewell，好多朋友都叫我走。但每個人都有自己原因決定去留，我爸爸已經好老，冇理由帶住佢去其他國家。我唔好想聽到佢哋講嘅說話，後來直情唔去食飯、甚至唔去送機。」
就算去到英國巡唱，6號原本都沒打算與朋友再見，但都始終因捨不得，與老友見面，再聽大家互訴心事。聽著朋友吐的苦水，就明白大家都各有難處，令他想起一首老歌的歌詞「彼此也在捱」：「直至我親身去你哋嘅地方，肯再去接觸，就會大家明白，心態都轉變。」
阿偉覺得大家再碰面，是好感動的事，但見著大家，仍然帶著憂愁，就算彈奏開心歌曲，現場觀眾都邊哭邊睇騷，就慶幸自己能帶給大家慰藉。至於泥鯭就在加拿大與中學同學重聚：「幾十年前大家喺班房讀書、搗亂，而家佢就坐喺台下睇住老朋友變成咁，好神奇咁就幾十年，但老同學見面係開心嘅。」就如阿正所說，大家抱著正向思想Move On就最好。
撰文：王連連
攝影：馬駿傑
髮型： Mad Ho
化妝： Onetung Ma
立刻加入《晴報》WhatsApp頻道，獲取最新娛樂、健康及著數資訊，仲有送禮活動！
U Lifestyle App睇盡《晴報》新聞資訊及自家節目 ↓
↓↓同步更新、更快更順↓↓
【免費下載】