新劇《香港人在北京》播出以來反應不錯，今次是金牌監製鍾澍佳回巢無綫後首部推出的劇集，他笑言除了陳展鵬和麥長青之外，基本上不認識新演員，全靠「煲劇」搵合作班底。多年來在內地打滾，鍾澍佳每次聽到有人嘲港劇老土過時就深感不忿，今次希望將經驗帶回娘家之餘，亦努力重振港劇的聲威。
同場加映：中年好聲音丨車婉婉亡母情緒鬱結致失聲陷低潮 順逆好壞拼湊成冠冕：無悔無怨
香港人在北京丨陳展鵬吳若希誤墮加密貨幣騙局 首集成JPEX事件翻版被形容「神劇」【下一頁】
鍾澍佳2005年舉家搬到北京居住，直至2012年才搬回香港，他笑言劇中的搞笑情節大多數都是出賣朋友的經歷，有苦有樂亦有感動，「做呢個戲有一個諗法，希望畀到香港觀眾睇到而家嘅北京係點，好先進、好現代化，有少少似我哋80年代去日本個感覺，好煥然一新。」他表示選角過程不容易，「北漂」多年對TVB人生路不熟，連洗手間位置都不知道，更何況是近年的演員。除了陳展鵬和麥長青以外，他都是靠煲劇去選角，「返嚟之後，我同時要負責77工作室，所以要睇晒TVB之前拍嘅劇集。睇咗《旁觀者》之後，發現有個演員做得非常之好，佢叫吳若希。之前我只係識《越難越愛》，但我覺得佢做到喜劇，喺佢身上搵到細個毛舜筠嗰種感覺同喜感，後來先知原來佢呢次第一次做女主角，（算係大膽嘗試？）好咪得囉，大家睇就知，真係好好笑，佢係成部喜劇嘅包裝之中，好重要一個膽。」
由於劇情牽涉歌唱比賽，於是鍾澍佳起用吳業坤和戴祖儀兩位歌手，他直言內地有不少歌手夢的年輕人鬱鬱不得志，而坤哥同樣面對過事業上的樽頸位，跟角色產生共鳴。而他相當欣賞他們在北上隔離期間，為角色和劇本下了不少苦功。「內地開工同香港好唔同，演員同導演監製溝通好足，因為大家住埋一齊，收工會食飯，好多時間研究同溝通，後來我返香港拍《新聞女王》，香港就真係難啲，TVB傳統拍劇一組廠一組外景，演員連瞓都冇時間，仲傾咩？」
香港人在北京│盧慶輝再度回歸拍無綫劇佬味濃 緋聞太多唔識處理2001年避走北上【下一頁】
受曾志偉親自邀請重返TVB，鍾澍佳坦言收入一定有所減少，除了情意結之外，心裡亦有一種使命感。「內地拍戲拍劇，識好多製片人，佢哋一講到港劇，就會覺得懷舊、老土，畀呢啲標籤我哋，我個心當然有啲唔順啦！我喺TVB出身，我識嘅所有嘢都來自呢個地方，港劇曾幾何時喺華語劇市場係代表潮流、時尚、有型、劇情好，點解而家會變成咁？我希望可以嘗試，令大家睇番港劇。」他表示今時不如往日，內地尺度已經放寬不少，而且由於多產而令他們進步得好快，甚至追及韓劇，他希望將經驗帶返香港。
鍾澍佳拉攏內地大型播放平台，TVB跟騰訊合作四部劇集，跟優酷兩年簽六部外加每年三部同步劇，能夠令TVB的製作有計畫地生產之餘，亦可透過好的作品推廣港劇。他表示自己開拍的劇集，會堅持有足夠劇本才會開鏡拍攝，令演員有充足時間準備，「飛紙仔都會飛，但叫做係精益求精，我唔係改革，呢啲唔係應該呀咩？《香港人在北京》同《反黑英雄》我都係齊劇本，《新劇女王》都有20集劇本先開工，內地冇齊劇本根本就冇演員會接，我喺香港都希望可以盡量做到。」
今次《香港人在北京》找來盧慶輝重返港劇，令不少觀眾感到驚喜。鍾澍佳指除了《新聞女王》找來佘詩曼合作外，已積極籌備希望再讓楊茜堯、林保怡等這些港劇Icon演員重現觀眾眼前，「唔可能一世都係陳豪同馬國明，佢哋都會攰呀嘛！男演員我覺得何廣沛同孔德賢幾好，而洪永城同傅嘉莉喺《凶宅清潔師》都好有喜感，所以兩位今次都有邀請入組。女演員方面，我想同林夏薇、何依婷、陳嘉慧、陳星妤、蔡潔及張曦雯等合作，不過近排我覺得最有喜感嘅係港姐郭珮文，我覺得佢應該會幾好笑，因為佢份人Off Beat，呢啲絕對有潛質成為喜劇演員！」
立刻加入《晴報》WhatsApp頻道，獲取最新娛樂、健康及著數資訊，仲有送禮活動！
【https://bit.ly/3RnCHkV】
U Lifestyle App睇盡《晴報》新聞資訊及自家節目 ↓
↓↓同步更新、更快更順↓↓
【免費下載】
攝影：林嘉銘
撰文：楊安莉