馬國明聽未婚妻話封口不談婚事 湯洛雯減20磅躁底搞婚禮壓力大

湯洛雯、張曦雯同李佳芯今日（26日）出席護膚品牌活動。日前馬國明表示收未婚妻封口令而未能透露年底婚禮細節，畀人以為好專制嘅準新娘湯洛雯今日就為呢件事解畫。

同場加映：尹光愛玩乜都試誓要唱到90歲 「廟街歌王」籲政府搞旺夜市自救

{{hket:ul-video id="9217"}}{{/hket:ul-video}}

湯洛雯解釋實情係自己都冇同馬明講太多婚禮細節，雖然馬明想幫手，但佢就唔想又要多費唇舌解釋。除此之外，佢都希望婚禮保有私隱，不想全部公開。：「其實我諗住靜悄悄咁影婚紗相，唔想畀人知，但佢就一嘢就講咗出去話會出埠影，嗰吓我都好愕然。然之後我都有同佢講，唔好講得太多，始終都想保留返一啲驚喜畀自己，唔想搞到我哋嘅婚禮好似活動咁，咩都話晒畀人知。」

{{hket:inline-image name="23.jpeg"}}{{/hket:inline-image}}

湯洛雯表示理解未婚夫為人隨和：「明白佢傾傾吓偈嘅時候，就無意咁講咗出嚟，咁所以第時唯有提醒返啲佢囉，就好似佢將我同佢啲情話，就咪鬼同人講。講完之後，佢又怕麻煩喎。於是我就同佢講要攞個平衡，唔係咩都同人講。」馬明聽晒未婚妻話，不過湯洛雯就話佢都有硬頸一面：「其實我都好聽佢話，而佢私底下都有嚴格嘅一面，佢份人都好有原則，佢對工作方面係好硬頸嘅，例如佢開工，佢一定要比準時早到場，我試過叫佢唔使畀自己咁大壓力，準時到咪得囉，但佢唔會聽，係要咁就係咁。不過佢呢個早到嘅態度係值得我學習。」

另外，馬國明出名一向唔使工作就會着得好Casual，但就負責搞自己同兄弟嘅禮服，湯洛雯就話唔理佢呢一part，畀佢自己搞：「佢會搵Stylist幫手，唔會着波衫出席啩！」湯洛雯稱為籌備婚禮感到大壓力，因為半年前完全冇理會，大日子逼近，好多事情十分複雜，佢希望婚禮可以從簡，冇玩新郎同開門利是環節，只想兄弟姊妹扮靚靚出席。湯洛雯又自爆成功減20磅，但冇得食甜品好辛苦令佢躁底，加上籌備婚禮壓力大，馬國明就要「硬食」：「佢一Feel到我忟，就叫我食雪糕。」

《晴報》圖片

撰文：娛樂組