口水多過浪花丨鄭裕玲周潤發CP點解冇撻着？ 成龍尊重Do姐當兄弟：冇食我豆腐

鄭裕玲（Do姐）嘅電台節目《口水多過浪花》日前請嚟導演林奕華做嘉賓，佢哋喺《Do姐林奕華有偈傾》環節中齊齊話當年。林奕華提到當年Do姐《不一樣的對話》等清談式節目時邀請咗唔少紅星，當時嘅一啲問題，今日睇番都相當有趣。

同場加映： 破毒強人｜郭柏妍嘆追求者約睇戲後冇下文 唔急破「A0」羨慕丁子朗身邊多靚女

{{hket:ul-video id="9008"}}{{/hket:ul-video}}

林奕華首先講到自己唔知Do姐原來同梁朝偉都好有淵源，二人曾多次合作，之後就講到成龍於節目中對待Do姐態度有別於一般女性，必恭必敬：「兩個大哥同大姐（成龍與Do姐），你同佢（同場）嘅時候佢都尊重你嘅，尊重即係佢冇乜當你係女人 。」Do姐喺呢個時間笑住咁講：「佢冇食你豆腐。」林奕華就表示因為二人level相同，所以Do姐做訪問出到嚟個效果都唔同：「（成龍）都喺度拍心口嗰隻，全部講嘅嘢都好用力，好有中氣，當你係『同類』，同類嘅特質係講緊點生存，你會問一啲問題，雖然你個個都問，對佢嚟講佢有佢嘅答法，譬如片酬……睇成龍就睇佢點當你兄弟。」

{{hket:inline-image name="Wh.jpeg"}}{{/hket:inline-image}}

不過之後林奕華就集中講發哥周潤發，發哥接受訪問時係1988年，佢已經多次同Do姐情侶檔演出，Do姐當時就問咗發哥一個問題，就係「其實你有冇愛上過我」，林奕華就喺《口水》反問DO姐有冇愛上過發哥，Do姐就表示：「我係拍緊時好鍾意佢，嗰個角色加上佢個人，我以前都講過，佢好照顧我，佢係一個好熱心嘅人，尤其是同佢拍戲，如果你入面同佢做CP佢就係好照顧你，感受到呢份照顧，但係冇愛嘅。（兄妹?）又唔係兄妹，Partner同事，我哋冇hanky-panky過，我feel唔到你男女之間嘅love，同埋因為佢keep住有拍拖……」

林奕華就表示如果係咁只係Do姐強行將自己感覺「shout down」，Do姐就再深入講：「你哋好多時都以為拍戲會falling in love with嗰個人，但我行先一定係做好份工，變咗嗰樣嘢唔帶入去，加上佢又有女朋友，大家都識，做咩去做啲咁嘅嘢呢，唔係我囉。」Do姐又強調佢同發哥當時都了解到機會都係得來不易：「可以得到咁嘅機會，做其他嘢就抹殺咗，寧願幾十年後，大家講我哋CP，中間冇啲唔好嘢撩到佢。」

Do姐又提到佢同發哥性格太唔同，雖然二人都愛好運動同健康飲食，但愛情唔係咁簡單：「如果係couple好難大家就到大家，融唔到埋一齊。同一個人相處好多微細嘢，拍攝咁耐相處就知係唔可以，兩個都係比較自我。」林奕華又睇到發哥當年表示同老婆嘅活動都係買餸，當時1997年將至，被問到覺得自己將來會身在何方，發哥就話自己唔會喺香港，會喺九龍。之後發哥被問到想唔想拍《審死官2》，佢就表示唔會，因為冇突破，而事實上發哥之後都闖入荷里活，種種都顯示發哥係一個表裏如一，又真正做到忠於自己嘅人。Do姐表示將來都想再同發哥合作：「要睇劇本，唔可以因為可以再合作而合作，唔想令人失望，打爛金漆招牌。」

圖片來源：網上圖片