呂爵安演唱會丨Edan怒罵騙徒為被呃錢Fans出頭 戙高腳彈琴小儀勁冧：腳趾好Cute

MIRROR成員Edan呂爵安首個個人演唱會《EDAN LUI “IN MY SIGHT OF E” SOLO CONCERT 2023》將於本周五（25日）揭幕，開show在即，有爵屎（Edan粉絲暱稱）誤墮假黃牛陷阱，Edan嬲到連出三個IG限時動態公開爵屎同疑賣假飛網站嘅對話截圖，為爵屎出頭。

同場加映：徐偉棟拒做徐少強2.0做自己 與妹相依為命成長：對佢好內疚

{{hket:ul-video id="8962"}}{{/hket:ul-video}}

Edan post出兩張爵屎同涉事網站對話截圖，涉事網站聲稱有內部門票：「每人最多只可留兩張 內部票購買是全款預留 演唱會前7天前出票。」不過當呢位爵屎用轉數快畀咗$2800購買1set門票後，就被涉事網站封鎖，Edan表示：「本身出新歌cover pic，咁happy 上tg grp（Telegram群組）望一望，見到有人被呃（疑似），即刻躁_咗，希望係誤會啦吓，事主就話畀完錢就被block。」Edan仲tag埋涉事網站要求佢哋出嚟處理。Edan又再留言：「提提大家，搵人買飛真係唔好畀錢先，一定係面交一手交一手。」Edan並點名收款人YIP TXX KXX：「可唔可以幫幫手解釋下？有冇人可以話我知，如果真係呃人，有FPS（轉數快）資訊係咪可以報警捉到佢？」

{{hket:inline-image name="7.JPG"}}{{/hket:inline-image}}

Edan再post出一間小店嘅聲明，指涉事網站盜用佢哋地址同近似小店account名，Edan嬲爆為fans出頭：「原來之前試過用人地址扮晒嘢，咁應該真係騙子了。其實都唔係第一次見到有爵屎被人呃，究竟有冇方法可以懲罰到呢啲人？」Edan發聲，相信已經可以令其他睇到嘅爵屎避過呢個涉事網站。其實Edan唔係第一個為fans抱不平嘅鏡仔，之前Anson Lo都因為神徒食炒價飛而喺台上喊喊，真係抵佢哋咁多fans！

Edan心情平伏之後就post出自己戙高腳着底褲彈琴嘅片段，用實際行動呵番fans，佢留言：「『E先生 愛人執照』Piano Version，練練下琴突然醒起未拍piano version，下兩首新歌都就出了，決定快刀斬亂麻解決埋佢。個pose……就好明顯係salute to藤井風啦。」Edan叫大家唔好掛住望佢嚿腳瓜同腳趾，不過佢「異於常人」嘅腳趾實在太過搶fo，佢嘅「正印」阮小儀都忍唔住留言：「原來你啲腳趾全平㗎，cute~~~」唔少爵屎都附和：「係囉，好得意！」、「成梳蕉咁。」

圖片來源：Instagram