林智樂（Felix）在2年前參加《聲夢傳奇》比賽入行，當時他只是17歲，是年紀最細的男學員。Felix年紀輕輕，思想卻非常成熟，仿如擁有「老靈魂」一樣。最近Felix推出了新歌《忘記趁早》，雖然他表示自己一早已看化，不愛爭名逐利，不過他直認自己恨攞新人獎，想拎獎拿原因只為多謝身邊一直幫助自己的人。
同場加映：寵愛Pet Pet丨阮政峰為冬甩配音衝破事業樽頸 唔急上位最重要學習：恰如其分
Felix一直都好喜歡香港作曲家澤日生，當得知自己要出個人單曲，他就膽粗粗向公司提出想找澤日生為自己作曲。「我自己搵澤日生幫手寫，從來無諗過可以搵到佢幫手，因為佢係我心目中係大師級人物，所以過程都好奇妙。今次好滿意首歌，有晒佢signature 嘅嘢係入面！」Felix亦指感情拿捏不算太難，「當係畀自己嘅一封信，好直接咁唱，唔需要咁多包裝。」
今次MV找來《聲夢傳奇2》學員、師妹趙頌宜（Maggie）做女主角，Felix指好開心對方肯獻出「第一次」，「之前想搵女主角要有藝術氣質，咁Maggie本身識畫畫，就搵咗佢。佢同我都似，又識畫畫、又識唱歌，不過佢個人就係感覺行先，我就現實啲。」他又指兩人因拍MV而熟絡，「佢之前喺我心目中係一個好cool嘅女仔，同佢熟啲就知佢成日做無聊嘢，相處模式係幾舒服。」
《聲夢傳奇》比賽完結後，15位學員都獲簽約星夢娛樂旗下廠牌「愛爆音樂」，並陸續獲得出歌機會。Felix是第13位學員出歌，他笑言等到頸都長，「等咗好耐，上年九月已經錄好，等到好心急，因為身邊嘅朋友一路出歌，幾時輪到自己呢？但後尾睇化咗，因為歌有歌命，同呢首歌係呢首出有好處，上年個環境好大競爭，或者大家冇咁多心機去欣賞廣東歌。」Felix又直認自己恨攞新人獎，「因為得一次，有邊個唔想拎獎？身邊一直有好多人幫我同支持我，好感動，好想拎個獎返嚟多謝佢哋。」
雖然等足兩年先有自己的Solo，Felix亦有一路裝備自己，及有自己填詞，「有一路練歌，每日都唱兩至三個鐘歌，我鍾意凌晨喺廁所練歌，嗰度先係屬於我嘅空間， 回音夠大，可以唱三、四個鐘，真係怪癖嚟！」原來Felix都係「浴室歌王」！
Felix在2年前已獲英國倫敦大學皇家賀洛唯學院錄取，不過他就因參加無綫電視歌唱選秀節目《聲夢傳奇》而由英國返香港，現在已停學了兩年。「本身讀art and media，最盡可以停5年。唔想Zoom上堂，同實體上堂唔同。可能之後喺香港考大學，不過今年有歌出，暫時都係工作行先。都會讀番書，唔係今年就係出年，同埋要睇下歌手呢條路發展成點。」
19歲的Felix不時被指思想成熟，想法異於同齡人，問到箇中原因？Felix笑言：「好細個已經對呢個世界睇得好化，入咗行之後人生旅程推進咗十年，而家打工要面對唔同事，讚賞或負評，又要將自己稜角磨滑。」但他直言娛樂圈這個圈子比想像中和諧，「成日聽人講娛樂圈係大染缸，但其實又唔係，我又好enjoy 自己做緊嘅嘢，同埋都開心。」
Felix亦為自己設了deadline，「我比賽完咗話畀兩年時間自己，而家啱啱起步，有成績交出嚟，又無話set死，希望30歲前做出成績，就算幕後我都好有興趣，平面設計、填詞等。」
Felix除了思想成熟外，亦長了一張「大眾臉」，曾被指同陸永權（陸永）同陸浩明（6號）似樣。 對於被指大眾臉，Felix心態豁達，「冇乜所謂，佢哋又係好talk得，喺主持界好hit。新人要需要有記憶點，不失為一件好事。」
《聲夢傳奇》｜18歲Felix林智樂原來好有畫畫天份 大眾臉唔止撞樣陸浩明同陸永【下一頁】
撰文：Crystal