徐偉棟（Edward）出身於演藝世家，父親是「大俠」徐少強，母親是雪梨，姨媽是米雪，他與胞妹徐頴堃出世後就成為焦點。外貌與父親十分相似的徐偉棟，坦言曾經感受到壓力，有段時間極想擺脫父親的影子，做自己。
近日，徐偉棟為電影《掃毒3 人在天涯》宣傳，扮演泰國國際刑警。他接受《晴報》訪問，提到童年時候，母親抱著自己去片場探班，他說：「我睇番啲相，老竇著古裝，抱住我影相。大個啲再去片場嘅時候，對場景好奇，記憶中係好好玩，專注去睇父母做嘢。有時我會坐埋一邊，Set番一個場景飾演唔同人物。有時睇完戲，都會喺屋企玩角色扮演。」
【新天蠶變】徐少強「奔七」兩鬢斑白大俠味不減 與尹天照經典「生死之交」合體【下一頁】
雪梨仔徐偉棟高大有型愛影相 同妹妹徐頴堃相依為命造就堅強性格【下一頁】
作為星二代，父親徐少強在娛樂圈中甚有份量，外界把父子二人拉在一起比較，徐偉棟直言感受到不少壓力，「最初返到香港，對呢個標纖係有壓力嘅，行內人或者外界嘅人，可能對我有期望...同時，好處係容易同其他人交流，人哋知你係邊個邊個個仔，易啲傾偈。慶幸到現時為止，大家都好錫我，冇試過聽到一啲難聽說話。係有時網上見到關於我屋企事嘅留言，睇到會少少唔開心...慢慢唔會放喺心上，累積負能量冇乜意義。」
兩父子性格不相似，有時徐偉棟卻覺得，自己舉手投足都會散發著父親的影子，「老竇好外向，我就內斂慢熱啲。細細個有段時間唔係同佢住，喺加拿大生活時，一啲小動作，例如行路呀，講嘢語氣，唔係特登學但都幾似老竇，當然有好多人話我個樣似佢。我想做番自己，唔想變咗做複制人，咁好冇意思。想有番自己性格同形象。」
徐偉棟笑言，父親的優點值得自己學習。他眼中，父親活像武俠中小說的大俠，「我老竇好Carefree，佢好似大俠，係出生錯咗年代，唔應該喺呢個年代，佢算係古代人。佢好幽默，鍾意講嘢，去到某啲場合自然成為核心人物，但講嘢真係太大聲！有時又唔會太顧別人感受...反而我就拘謹一啲。我都想好似佢咁Carefree，又唔可以太放縱，要找到平衡位。」
徐偉棟選擇踏上父母的演藝路，入行以來又唱歌做戲，熱愛攝影，熱愛射擊運動，動靜皆宜，在《掃毒3 人在天涯》拿真槍拍攝自然難不倒他。他近年愛上攝影，愛創作，透過攝影作品來表達內心世界，現正籌備在橫店舉行第一次個人攝影展。
長大後的徐偉棟，內斂寧靜，其實小時候的他十分好動，他形容頑皮，家人也感到頭痛，尤其是姨媽米雪，對他管教甚嚴，「可能媽咪受以前經歷影響，我入行之後，佢叮囑我做事要小心，例如唔好飲醉酒，唔好搞三搞四。細個時，反而姨媽對我哋說教多啲，做錯事就鬧。我細個好曳，好似有過度活躍症咁周圍走，唔識停，喺屋企試過爬窗花撻咗落地；同屋企人出街，喺商場亂跑，爬上一個玻璃窗擺設架上面，又墮地，我就撼落玻璃門；又試過喺扶手電梯跌落嚟撞穿頭，姨媽見到立即抱我去附近急症室縫針，好彩大個咗四肢健全！」姨媽經常講道理，要他和妹妹勤力讀書，學習儲錢理財。
父母在徐偉棟7歲時候離婚，他約在12歲時，與妹妹徐頴堃跟外婆、舅父等親戚在加拿大生活，「細個嗰陣，唔會同家人講內心世界，朋友又未必傾得咁深入，同阿妹就乜都講。好事壞事，開心唔開心，唔如意嘅事佢都知。細妹好識𠱁番我。我以前拍拖過程中有啲唔開心，我未講佢已經知。妹妹係我抒發情緒嘅對象，會搵佢去飲悶酒，我甚至唔介意喺佢面前講到喊。我哋嘅關係，變咗好似我係佢細佬，佢調轉做家姐安撫我！其實我而家諗起都好內疚，細個成日同佢打交，真係冇當佢係女仔。」
40歲的徐偉棟並沒有因為父母離婚而影響自己對於愛情的渴望，他會小心選擇合適自己的對象，稱：「我成日講唔會生小朋友，好大責任呀，而家環境未必適合培育下一代，結婚都會好審慎，而家咁大個人冇得衝動，結婚對象尋覓中。」大俠風範是甚麼？「到自己能養起一頭家，才會諗結婚。」
撰文：王連連
攝影：陳健珊、馮凱宜
髮型：Amber Tse @IL COLPO
化妝：@333stephiemakeup
服裝：Club Monaco
U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】