2023香港小姐才藝表演丨莊子璇王怡然尷尬小學雞跳唱 走音牧童笛 雙手畫畫挑戰溫碧霞

話咁快又到咗一年一度嘅《香港小姐競選》，喺淘汰同退選嘅情況下，眨眼得番16位佳麗，今日大會喺官方社交平台post各位住麗嘅才藝表演影片。最估唔到就係去到16強都仍然有「如初見」嘅感覺，講緊嘅係仲有首輪面試嘅「獵奇」心情呀！每睇一段表演，小編個心仔都仲係卜卜跳得好快，萬分期待佳麗有咩驚喜。

同場加映： 

獨腳絲打噏丨蝦頭經歷疫情移民潮唔想再等 爆感情黑歷史：自嘲代表脫離悲痛

{{hket:ul-video id="8912"}}{{/hket:ul-video}}

當中，之前批評TVB影得佢唔靚嘅14號 陳怡名表演樂器五音排鼓，而1號 吳詠婷、10號 陳霈錤、13號 陳曉彤一樣表演彈琴，至於7號 毛志琛就以長笛吹《千與千尋》，以上幾位佳麗都非常穩陣，不過不失，稍欠驚喜；最出色可以話係17號 王敏慈，表演彈古箏之外再大跳中國舞，舞台感十足，睇得出食過吓「夜粥」。

{{hket:inline-image name="4.JPG"}}{{/hket:inline-image}}

另外，大熱門16號 郭珮文就演唱王菲嘅國語歌《開到荼靡》，眾所周知唱王菲歌都係「葉師傅」——唔容易呀！郭珮文都尚算駕馭到，可惜佢眼神長期遊離冇自信，一啲都唔壓台。5號 梁倩淇大玩滾軸蹓冰加中國舞，特別呀！飄逸嘅扇舞令畫面豐富，叫做「有啲嘢睇」。6號 胡睿涵唱廣東歌《喜歡你》，有自信，但難度比較低有唱K嘅感覺。另一大熱門9號 潘明璇表演跳敦煌舞，非常穩陣，都睇得出有備而來；除咗潘明璇，8號 姜依宁都係表演跳舞，都係冇錯漏，但就冇令人有驚艷嘅感覺。

騎呢組嘅表演有15號 莊子璇，表演唱跳《心急人上》，非常業餘「柴娃娃」，不過就靠畀心賣萌攞分。12號 梁晶晶就表演雙手同步繪畫，而出到嚟嘅作品就有如溫碧霞名作《虎虎生威》，但勝在可以一邊繪畫一邊介紹自己，都幾有計。

4號 王怡然就「表演」學習Ukulele，因為佢水準就好似第一堂學Ukulele咁，之後再跳唱《Barbie Girl》，除咗齣戲仲hit緊之外，搵唔到賣點係咩。另外，3號 鄧凱文大跳椅子舞，同樣地都係未學滿師就表演，長腿、身材養眼，他日學成都可能幾好睇，真係要加把勁。

最經典嘅莫過於2號 黃泳嘉吹奏牧童笛，吹出經典歌曲《My heart will go on》，不停走音實在係喜感十足，相信之後可以加入TVB綜藝組。

撰文︰娛樂組 圖片來源：截圖