安心事件後首次受訪丨黃心穎不忍爸爸傷心靠音樂搵出口 泥鯭監製抽離拖友身份：唔好嗌交

黃心穎4年前發生「安心事件」後潛水多時，今日佢接受《叱咤樂壇》謝茜嘉及Woody訪問，宣傳新歌《沙包》，係事件發生多年嚟首次正式受訪。表現經驗豐富嘅佢都表示緊張，心跳控制唔到咁滯，亦希望希望表達到自己想講嘅嘢。

同場加映：  港姐首輪面試學歷同年齡偏高 一片睇晒今屆參選佳麗質

{{hket:ul-video id="8430"}}{{/hket:ul-video}}

黃心穎加入樂壇成為唱作人加歌手，原來都係因為疫情：「其實我都估唔到，covid-19（期間）其他人都好多skill解鎖，有一日喺屋企哼歌，又試下填啲詞落去，我冇底子算係smooth，嚟得容易，細個學到grade 3鋼琴，distance programme（遙距課程）讀年半作曲，每個星期live class，有同學6歲，有同學70幾歲。一開始知道咁多workload有諗過放棄，冇底子要用多人5、6倍時間，第一次將自己melody擺入programme，聽到覺得好感動就繼續落去。」

{{hket:inline-image name="272275235_359657485566189_8606399141143011062_n_600.jpg"}}{{/hket:inline-image}}

黃心穎表示音樂幫佢度過咗艱難時刻：「擺低一啲情感情緒，音樂幫咗我好多。」佢表示搵張楚翹老師教填詞，老師教佢話其實一份詞唔多字，要用strong啲嘅字，終於喺2020年4月1日作咗《沙包》：「沙包一開始係from我以前寫嘅一個日記，（事件發生後）初時成日想瞓唔想面對，之後就沉溺，聽啲慘情歌，『迷上一蹶不振』（歌詞），到最後要救自己，紀錄我一啲情緒經歷。」

黃心穎先後推出《crown me》同《沙包》，都係同男友泥鯭一齊做監製。男友幫手前約法三章，要抽離拖友角色：「『唔好嗌交呀』，佢做監製我就聽佢意見，因為我都係一個好有主見嘅人，佢對我係鼓勵性多，我學音樂，我成日問佢我做緊嘅嘢係咪好stupid，佢都一直話我鍾意就去做，鼓勵一直都在。」至於technical上嘅嘢男友都幫到佢，而有啲佢學嘅嘢男友都未知，大家互相滋長。

黃心穎又提到前公司TVB都對佢不薄：「我唔知可以做到其他啲咩，學音樂做到一樣實在嘅嘢。有一刻同前公司傾，叫我拍劇同綜藝，但我就想做新嘢。但完咗約又有啲怯，決定再做啲咩，面對呢個恐怖，我覺得值得、好玩。」佢又指以前會介意人哋講咩，但而家已經可以坦然面對：「再難聽說話我都聽過，人哋點對我係我嘅因果，我只可以做好自己。」

黃心穎亦講到家人都係佢走出負面情緒嘅一個關鍵：「『其實最殘酷親切慰問』（歌詞），屋企人問都唔想答，覺得好煩，而家好好彩有呢啲陪伴關心先行出呢個stage。音樂對我嚟講係一個情緒出口，嗰樣嘢（安心事件）永遠都係part of 我，我會盡量感受佢。」問到點捱過呢段日子，佢就話：「一開始就sign up咗做戲，佔好多時間，冇時間諗其他嘢。返到嚟見到家人，又撥開雲霧多少少，我都唔忍心見住我爸爸見到我咁。領養咗我隻狗，嗰時係好怕同人接觸，但要去Dog park同walk佢，就見到其他狗主，就慢慢打開個心多啲。之後接觸佛學，個人冇咁執着。」

圖片來源： Instagram