方中信變住家男學懂「放下」超跑 爆被囡囡ignore採陰補陽抗衰老

「愛車之人」方中信為周家怡主持嘅《恨駕女神》擔任嘉賓，同周家怡認識多年嘅佢除咗講車之外仲被女方引導到佢自爆唔少私事，最後都忍唔住「鬧」周家怡，話畀佢呃咗嚟一個唔係講車嘅節目，非常搞笑呀！

同場加映：

林明禎生日狂收BLACKPINK Lisa禮物 願女紆尊降貴為偶像打雜做阿四

{{hket:ul-video id="8377"}}{{/hket:ul-video}}

方中信曾經視賽車比賽為第二生命，當年家中收藏靚車亦屬於大馬力級數，但自從有了朋友，當上爸爸之後，方中信割愛賣掉所有大馬力電單車。周家怡於訪問中講到，方中信另一個身份係賽車手，男方就話：「梗係唔係啦！玩過吓咁啦！」有型靚仔嘅方中信曾經有東方李察基爾之稱，佢自嘲：「以前就東方，而家就東莞呀！」

{{hket:inline-image name="33.JPG"}}{{/hket:inline-image}}

方中信一講到車即刻變成「開籠雀」，周家怡問佢擁有過多少部車時卻表示「唔記得」，同時稱揸得最耐嘅一部車都只不過三年。周家怡打蛇隨棍上，暗示問佢keep得最長時間嘅伴侶係幾耐？佢話：「最耐嘅咪係我老婆，真係冇得換喇！」又講到點解而家自己唔再揸跑車，「講真，啲兩個位嘅跑車，買嗰陣時就誇啦啦，買咗返嚟蜜月期兩個月就擺喺度。講真我都冇乜地方去，冇理由揸嗰啲車去買餸㗎？試過一次，我覺得好唔方便。」

方中信表示佢依家最想要嘅係SUV，「（跑車）已經賣晒，因為學識咗『放下』呢個兩個字，隨住年紀，思想都會改，不過見到靚車個心仲會囉囉攣，但理智戰勝咗心魔。」言談間周家怡笑稱對方說話的聲調「好正」，方中信淡然地說：「呢啲係天生喎，有啲人話我個樣好惡，其實我對你都冇惡意，只係唔笑啫，唔笑你都要詐我型？如果你要鬧我咁嘅樣，就要同我爸爸媽媽講，係佢哋生到我個樣咁，唔關我事喎！我惟有講多少少嘢，冚番啲人覺得我好惡嘅觀感啦！」

問到男神點保養，佢就表示自己好早瞓，同埋會「採陰補陽」食雪蛤膏。戶外訪談時，方中信突然被烏蠅「襲擊」，之後佢搞笑咁講：「又唔見有女摟我。」周家怡笑到停唔到，就問佢係咪話自己囡囡，方中信：「我個女都唔摟我，要零用錢先搵我。」曾經何時，方中信與周家怡是「跑友」，聽到女方話有時素顏揸車去飛鵝山跑步，方中信又再「冷面笑匠」上身提佢下次記得化妝，「我見咁多人著晒瑜伽褲去跑步，都係咁啦，唔通又驚醃親大髀呀？都唔係講車嘅節目，我唔知嚟仲乜？畀周家怡跣咗我一鑊添！」

撰文︰娛樂組