吳大強缺席演唱會綵排群組報平安 周吉佩未辭工已簽約無綫

《中年好聲音》「夢想成真演唱會」將於2023年5月13及14日於九龍灣國際展貿中心舉行，今日（8日）26強人馬集合喺土瓜灣進行綵排。不過71歲吳大強噚日下午於將軍澳中心出席宣傳活動時，突然暈低，今日亦缺席綵排。

同場加映： 法言人丨黃嘉樂唔續約TVB老友勁擔心 婚姻出現「小三」強調最愛老婆

{{hket:ul-video id="8158"}}{{/hket:ul-video}}

周吉佩接受訪問時表示，同吳大強於演唱會中將會有幾個大環節合作表演，而昨日大強突然暈倒，都有喺《中年好聲音》群組報平安：「我哋有個group都有傾偈，佢都好精神，答我哋：『多謝大家關心。』知道佢冇事，心都舒服晒。」

{{hket:inline-image name="DSC_3468.JPG"}}{{/hket:inline-image}}

另外，昨日《中年好聲音紅白大戰》中龍婷、李思林、曹敏寶、支嚳儀合體跳唱《隆重登場》被網民大讚，支嚳儀就話龍婷係佢哋之中嘅「舞蹈擔當」，眾人由上月24號已經開始練習，同埋係佢哋第一次跳咁高強度嘅舞蹈：「梗係開心啦，我覺得要keep住呢個開心，繼續學習，因為有好power，啲評判同我哋講因為最尾呢場show係男子組贏，我都覺得男子組好犀利，可能（我哋）缺乏嗰個power。」對於同Chill Club頒獎禮打對台有冇壓力，佢哋表示都係盡力做好自己：「因為我哋自己都未搞掂，冇時候去顧慮咁多其他嘅嘢。」龍婷又透露佢哋正為演唱會練緊一啲新技能，支嚳儀就話會加入多啲新成員入去《「龍」重登場》group。

昨日《中年好聲音紅白大戰》中，雖然男子組總分落敗，但於跳舞環節中獲較高分，周吉佩都話跳舞係新嘗試，覺得係自己嘅一個突破。另外，佢又提到近年好少有《紅白》，可以畀佢哋廿個參賽者參與，已經非常榮幸，對於收視已經唔係佢擔心範圍，嚟唔切消化。周吉佩又提到自己仍然要返工，問到佢幾時會辭職佢就話：「而家同TVB有個合作，但你話將來發展係點，我而家手頭上工作仲有，所以我安排好個工作之後，可能之後會有啲消息公布，希望有啲新嘅發展。」佢表示已經同TVB簽約，但就唔方便透露詳情。

李佳接受《晴報》電話訪問，提到吳大強暈倒時正正就在他的身邊合照，目擊整個過程，她表示：「真係好驚，原本佢企喺我隔籬一齊影相，點知佢突然挨近我，原來係暈低咗，我哋好緊張打算移佢出嚟少少，但佢好快就醒番。大家都唔知咩情況，所以真係好驚，事隔幾個鐘我傳短訊問候一下佢，佢覆我話『Everything Normal』咁我就放心晒！（知唔知佢會唔會影響演唱會演出？）呢方面要公司安排，但大強哥一向身體健康，應該休息完會好好多。」

提到吳大強已經71歲高齡，會否TVB安排太沉重工作量，導致吳大強不支暈倒？李佳表示：「工作量其實OK，我哋幾十個人，唔係次次都全部人開工，有時你唱，有時我唱，分配得好好畀大家。我個人就唔覺得好辛苦，但吳大強工作量我就唔清楚，相信公司唔會令大家難做，分配得好好。」她透露自己媽媽年紀都大，幸好身體非常健康，都會出席今次演唱會，而且上海的姨媽等家人都會來港捧場，一齊慶祝母親節。