《中年好聲音》昨晚圓滿落幕，冠軍周吉佩、亞軍李佳、季軍羅啟豪，而龍婷得到「觀眾最愛好聲音」獎項，賽果推出後，網友有不少聲音戥歌唱老師李佳不值，認為唱功應該比周吉佩優勝，不少留言斥「造馬」。周吉佩接受訪問時坦言沒有想過得獎，承認今次自己跑出是「爆冷」賽果。
同場加映：聲夢傳奇｜冼靖峰挑戰快歌擺脫慢情歌王子形象 同屆學員各有發展：與自己比較
中年好聲音丨周吉佩穩陣演出贏歌唱老師李佳奪冠 台上爆喊感激太太：我竟然有Fans【下一頁】
周吉佩事後接受訪問，他表示：「心情仲係好激動，好似發緊夢咁，真係冇諗過，今晚真係喜出望外，特別係唱慢歌《Forever Love》見到有91分，當下真係傻咗，多咗少少信心，（爆冷？）爆冷呀我都覺得，其實六位個個都好犀利，大家都知龍婷同李佳係大熱門，但我不斷催眠自己今晚當係表演。我曾經過往回合被Foul過，反而今次預咗輸個心情係放鬆好多。」對於網友在TVB FB狂留言斥「造馬」，吉吉認為任何人得獎都總有反對的聲音，「之前回合不時都有失準，所以一直都唔諗咁多，只係想今晚做到應有水準，網民對我嘅意見收到，我會慢慢做番好自己，希望一步一步畀大家見到我嘅努力。」
問到如何慶祝？吉吉笑言太太答應會請他去酒店Staycation二人世界，至於會否再次入行做歌手？他表示：「有機會一定會努力，睇公司有咩新節目畀我安排同嘗試，咩工作我都可以。」而吉吉的落選港姐太太黃彥欣全程都舉住牌支持，她跟好姊妹曹敏寶一齊接受無綫娛樂新聞報道訪問，超冷靜個性表現得相當可愛，她說：「我係好堅強嘅動物，完全冇喊，我連結婚都冇喊！（今晚有冇好感動？）真係冇喎！可能我聽佢唱情歌聽慣，當你日日聽唔會有感覺，但跳舞真係突破嚟嘅，佢本身係手腳唔協調，好proud of佢一星期內跳到出嚟！」她坦言起初嬲曹敏寶撐吉吉參賽，而家反過來要多謝她，當問到會否支持吉吉全心全意再入行做歌手，黃彥欣笑言：「支持，你兩個喺度夾住我，迫住我講支持啫！(點慶祝？）今晚真係冇諗過攞獎，所以冇諗過慶功！」隨後黃彥欣被拉入鏡跟吉吉一齊受訪，主持人指太太答應讓他入行，吉吉都大感驚訝，「真呀？你竟然開綠燈？不過都要有搵定收入嘅，要拿捏得好啲，我聽日都要返工。」兩人應要求在鏡頭前錫錫，起初黃彥欣見到吉吉的「豬嘴」嚇到縮一縮，還追問：「錫邊呀？」吉吉笑言：「錫嘴啦梗係，唔係唔畀錫呀？」兩公婆的互動非常搞笑！
中年好聲音丨《法言人》主角咪嘴唱歌宣傳勁尷尬 龍婷成為票后竟無緣打入三甲【下一頁】
屈居亞軍的李佳表示不會失望，「雖然話我係大熱門，不過今日大家狀態好好，冇諗一定入三甲或者攞獎。可能我第一個出嚟唱，唔知緊張定壓力，我覺得可以做得再好啲，好彩分數唔算低。吉吉贏係因為真係唱得好好，綵排嗰陣我都對佢好有信心！多謝大家支持，我唔失望，入到六強已經好開心，我有興趣娛樂圈發展，但唔會放棄教唱歌，因為有呢班學生我先有《中年好聲音》呢個機會！」
至於龍婷大熱倒灶三甲不入，她表示：「我覺得佢哋唱得好好，李佳同吉吉本身就喺我心目中唱得好好，我覺得自己第一隻歌發揮得唔係幾好，唔緊要，得到『觀眾喜愛好聲音』獎我最開心，四日之前我失咗聲，有聲出我已經好開心，唔緊要啦，發揮得幾好，唔會影響心情。(返西洋菜街謝票？）唱得咩？呢個主意好好，到時你係咪嚟先？」至於與丁文俊的緋聞是否隨比賽完結而結束？她笑言：「佢好好人，好人卡畀咗佢啦！」
U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】
採訪：黃寶蓮
攝影：林良明
撰文：娛樂組