第41屆香港電影金像獎丨王丹妮頒獎唔識讀得獎者姓名 被轟冇做功課虛心道歉

第41屆香港電影金像獎昨（16日）晚進行頒獎禮，由於節目係現場直播，全晚都出現唔少「蝦碌」位。當中最佳編劇獎項由上屆最佳新演員王丹妮以及男星劉俊謙一齊頒獎，過程中王丹妮唔識讀得獎人嘅姓名，遭到網民抨擊。

同場加映： 第41屆香港電影金像獎丨呂爵安粉絲安排遊艇成大會背景 蝦頭谷胸現身性感尺度贏林明禎

{{hket:ul-video id="8031"}}{{/hket:ul-video}}

本屆金像獎「最佳編劇」由《神探大戰》韋家輝、陳偉斌、麥天樞得獎，不過頒獎過程中出現小插曲，王丹妮揭曉得獎人時，讀到「麥天」2字後語塞，當眾轉頭問劉俊謙：「呢個字點讀？」不過劉俊謙似乎都唔肯定點發音，最終兩人乾脆跳過該字冇讀。

{{hket:inline-image name="01984c2ecd73088d0dcf1d575337a18e.jpg"}}{{/hket:inline-image}}

韋家輝、陳偉斌、麥天樞上台時互相推讓，最終由韋家輝率先上台，並從王丹妮手上接過獎項，韋家輝先多謝上帝、大會及英皇：「多謝好優秀嘅演員，成日喺我哋飛紙仔下，都可以演繹得咁好，多謝我哋兩位才子（陳偉斌及麥天樞）。」陳偉斌先三度多謝韋家輝：「多謝天樞、多謝（游）乃海，多謝我屋企人，多謝我天上嘅爸爸，多謝劉青雲，佢真係怪物，佢喺現場睇住我哋寫劇本，跟就收到就可以將成十行嘅對白，就背好晒，演得好好，多謝劉青雲，多謝《神探》。」

麥天樞先多謝父母，表示冇佢哋就冇自己，以及拍檔韋家輝、陳偉斌：「多謝台前幕後所有演員及工作人員，因為拍戲已經夠辛苦，但我哋仲唔畀劇本你哋，飛紙仔飛到最後一刻，如果唔係你哋全力付出，呢個戲都冇可能成真。」又笑稱因為趕劇本，搞到個人黐黐地，感謝女友的包容與他行落去。麥天樞又說：「我入行時有人同我講呢行係夕陽工業，我覺得佢哋冇講錯，因為太陽係會落山，過咗一段時間會升返上嚟，大家加油，多謝各位。」

事後，王丹妮遭網友批評唔專業兼冇做足功課：「其實名單都唔係好多人，就算事前唔知係邊個得獎都可以睇晒一次有咩人先啦」，都有網民認為兩名主持人處理方式唔妥當：「直接跳過真係失禮到爆。」

王丹妮今日於社交平台限時動態虛心致歉：「昨晚在頒獎典禮上表現未如理想，對大會和得獎者都感到非常抱歉，對於有這樣的情況我實在責無旁貸，願意並會汲取此次教訓，以後所有工作都定必努力做得更好和更負責任，希望日後有做不好的地方，也請大家繼續多多給予提點。」

撰文：娛樂組