死屍死時四十四│余香凝拍床戲讚拍檔肌肉夠晒結實 黃又南恨結婚不斷傾「湊仔經」

由毛舜筠、鄭中基（Ronald）、呂爵安（Edan）、柳應廷（Jer）、劉江、黃文慧等人主演的黑色幽默電影《死屍死時四十四》，即將在四月上映。戲中余香凝與黃又南結婚後，連同女兒，一起與母親（毛舜筠 飾）、弟弟（楊偉倫 飾）同住，一家五口居住在數百呎的蝸居。他們有日發現家門外有「屍體」而引發一連串笑話。開場不久黃又南跟余香凝已經有激情床戲，十分吸睛，黃又南拍這幕戲甚至爆汗，佬味甚濃。但現實中，仍未有結婚對象的他，都心急早日成家立室，有自己的小孩，余香凝笑言大家走在一起竟然是談「湊仔女經」。

同場加映：中年好聲音丨吳大強Chill住管教任四個仔發展 71歲追夢感幸福：畀大家睇到衝勁

{{hket:ul-video id="7808"}}{{/hket:ul-video}}

{{hket:inline-image name="0001-155.JPG"}}{{/hket:inline-image}}

新戲由黃又南、余香凝等一家人，在門外發現一條屍體開始，引發出一連串搬屍、運屍、棄屍的笑料話題，以帶出普遍香港人遇到的居住問題、鄰里間的關係和道德等題材。黃又南和余香凝首次飾演夫妻已經有床戲，二人接受訪問，表示拍攝時不會尷尬，反而黃又南覺得唔好意思，他說：「我自己尷尬囉！因為本身大汗，怕滴汗落拍檔度就唔好意思。現場好多燈，我哋又焗喺被入面，勁驚多汗。好彩拍檔好，唔使NG，鏡頭冇見汗，係我自己身有屎。」余香凝笑言幸好沒有異味：「我可以認證唔臭的，仲有啲特寫鏡頭影住我摸佢背脊，都真係幾濕，但都幾紮實。」而且她在戲中更以制服誘惑，穿上空中服務員制服色誘老公。

{{hket:inline-image name="7_600.jpg"}}{{/hket:inline-image}}

{{hket:inline-image name="0001-166.JPG"}}{{/hket:inline-image}}

黃又南大讚這個拍檔隨和，不用埋位的時候都會傾一餐，余香凝謂二人好傾得，等埋位一個多小時也說不停：「佢畀我印象好陽光男孩，原來佢好多嘢講，好多時等轉機位、等個幾鐘我哋就不停講，有時傾吓車，仲會傾吓湊細路。」余香凝婚後育有一女，不時分享跟女兒的生活日常，但單身的黃又南，就不斷講侄仔，大家話題離不開照顧小朋友，他謂：「我好鍾意小朋友，佢會講佢個女，我又講吓侄仔。佢開工幾日就話，第一日拍嗰陣已經覺得內疚，因為要留低BB拍戲，應該多啲陪伴。」

{{hket:inline-image name="0001-131.JPG"}}{{/hket:inline-image}}

{{hket:inline-image name="0001-160.JPG"}}{{/hket:inline-image}}

喜歡小朋友的黃又南將踏入「四十而不惑」之時，但仍未有結婚對象，他肉緊地說：「我39咋，未到40（歲），我都想搵到對象，但越想搵越搵唔到，我覺得我哋做藝人其實好被動，有時同朋友出嚟，有啲女仔未見過我，我就會一眼都唔敢望，會驚人哋以為我望佢有乜企圖。我唔係有偶包，但反而會諗住人哋會點睇我，可能我諗多咗。」

黃又南入行以來緋聞並不算多，最為人所知是跟杜如風傳緋聞譜姊弟戀，當年女方接受電視台訪問，自爆曾跟一個男偶像拍拖，為避免戀情曝光，於是匿入車尾箱避開追訪；之後又曾跟趙雅之兒子黃愷傑的舊愛Denise拍拖去深水埗買工具。另外亦曾傳他跟珠寶店太子女莊莎娜秘戀，但黃又南否認戀情，表示二人只屬朋友。

至於戲中，一棟被地產發展商包裝得美輪美奐的私人屋苑，突有一具不名來歷的屍體出現於單位門前，為了不想自己的單位變凶宅，各個家庭展開一場鬥智燒腦大鬥法。現實中，很多香港人都會視「上車」置業是人生目標，余香凝表示自己一直有努力儲錢，希望有日能夠儲錢成功，送一個安樂窩給父親：「努力中，但而家買樓真係好難。」而黃又南以前曾置業，不過未能為他賺大錢：「買過樓花，本來係買畀家姐，點知當時樓巿好差，賣出去時候我係倒蝕廿萬，如果等多半年就賺四百幾萬，真係冇運呀！」現時的他則覺得有太多不確定因素，所以不會隨便再買樓，再觀望情況，審慎處理。

U Lifestyle App自家節目登錄《U TV》專區！

↓↓試玩、試食、試用影片任您睇↓↓

【立即體驗】 

攝影：陳健珊

撰文：王連連

髮型、化妝：Henry Tse@ BigCstyling（黃又南）

服裝：agnes b（黃又南）

髮型：Ken Hui @ Artify lab（余香凝）

化妝: Melody Chiu（余香凝）

服裝: iBLUES（余香凝）