廉政狙擊丨41歲胡定欣演42歲方力申媽媽 相識25年Bob質問：有冇溝過佢

現年41歲嘅胡定欣喺新劇《廉政狙擊》中飾演方力申（小方）後母，劇中講兩人同年出世，呢個「母子」設定夠晒「奇葩」。日前小方網上post同定欣多年前、而家嘅合照畀劇迷找不同，呢個組合仲引嚟金牌媒人阿Bob留言，唔通想撮合佢哋？

同場加映： 娛樂 • 新四十二章丨 「揸流灘」主角捱過低潮惺惺相惜 吳子冲捉緊機遇追夢 史穎喬感恩前輩無私傳承

{{hket:ul-video id="7707"}}{{/hket:ul-video}}

小方喺《廉政狙擊》飾演敗家二世祖陳世邦，為定欣老公與前妻所出，而在現實生活中小方大定欣1歲。劇情講述定欣與小方不和，一出場即上演鬧交戲，小方向定欣連番惡言相向：「同你同車呀？我驚我會嘔呀」、「你又喺度扮老母教仔呀」、「唔使再喺度扮慈母喇！我老豆死咗好耐喇，唔需要你喺度代佢教仔呀」，估唔到做母子都有啲火花！

{{hket:inline-image name="2.jpeg"}}{{/hket:inline-image}}

小方post「前世今生」合照，留言：「大家最近有冇睇《廉政狙擊》？入面，我呢個衰仔邦少同我同年出世嘅繼母不停鬥嘴鬧交。其實我同定欣早在16、17歲就認識，而我第一次入電視城做觀眾就係支持定欣參加《全球華人新秀歌唱大賽》，估唔到隔咗咁耐我哋先有機會合作做戲，佢仲要做我阿媽，『真係有冇搞錯』（佢講but我心裏暗喜）。記得我哋拍嘅第一場戲，我嘅第一句同佢講嘅對白係：「八婆！」老友呀老友，我永遠都會記得我哋第一次合作有幾咁愉快。」小方hashtag指網民過咗咁多年都認得到佢哋，證明冇整容呀！

定欣都忍唔住回應：「真係有冇搞錯？16、17歲嘅我哋，點會估到20幾年後我哋合作拍劇，我仲做你後母...今天嘅小方已經同以前好唔同，你真係有好大嘅改變！唔知下一次嘅合作又會係點呢？最緊要係友誼永固。」

Bob留言「拷問」小方：「講！嗰陣有冇一齊過？有冇溝過佢？」其實小方、定欣係金牌媒人Bob一直sell唔出嘅筍盤，唔知係咪想趁呢個機會一次過「出」晒呢兩個「尊貴客戶」呢？

不過小方就回應：「冇。係我游泳隊友對佢好有興趣。至於佢哋有冇嘢？你問佢。」定欣就話小方講「多咗」，真係好耐人尋味呀！定欣同小方一直都過唔到電，之前陳敏之爆料指小方因為覺得定欣好惡，所以未有展開追求。

撰文︰娛樂組