朱咪咪信錯「朋友」紅館個唱告吹 險簽惡毒賣身契：我係豬頭炳

咪咪姐（朱咪咪）當年一個廣告︰「講嘢最緊要有牙力！」至今大家都好深刻，對佢醒目、轉數快嘅形象就更加烙印喺心底。朱咪咪唱得又talk得，經常走埠多個國家登台，非常搶手。不過日前咪咪姐自爆「老貓燒鬚」，差啲被賣豬仔之餘分分鐘仲要被吞兩年血汗錢。

同場加映：流水落花︳鄭秀文人生感圓滿唔恨被嗌媽媽 陸駿光體會做天后老公有壓力

{{hket:ul-video id="7639"}}{{/hket:ul-video}}

朱咪咪闊別紅館6年，原定去年9月開騷但最後告吹，個唱取消係因為合約出問題，咪咪姐慨嘆自己「老貓燒鬚」，「我朱咪咪行走江湖咁多年，睇我咁精靈，點會畀人呃？但我先係豬頭炳。」衰在太信任人，表示︰「以為成日約食飯，嗰個就係friend...做咗咁多年嘢，有時候坐低靜落嚟，都鬧我自己，使唔使耳仔咁軟？」

{{hket:inline-image name="9e421ba0062afe6c1718e6d6260fe941.jpg"}}{{/hket:inline-image}}

咪咪姐指，一名認識多年嘅女性朋友，舊年不停游說佢開演唱會，佢覺得太辛苦而拒絕，登台好過，但呢個朋友「死𦧲」，又有粉絲一直追問咪咪姐幾時再開個唱，佢最後心軟答應對方，「我衰在邊個對我好，就當人哋係我心腹。」咪咪姐以自己公司CMM入紙申請紅館檔期，原本佢同呢位「朋友」夾份做投資方，但後來又自覺一把年紀難以兼顧，於是退出投資，收歌酬專心演出。

該女友人之後草擬一份演出合約Whatsapp予咪咪姐簽署。咪咪姐以為只係一份歌手演出紅館騷的合約，即屬一次合作，好彩咪咪姐同合作多年嘅耀榮娛樂舊職員講起，一睇合約先發現大件事，咪咪姐險被「賣豬仔」，「我唔係唔識睇合約，係我未得閒睇，我要print出嚟先睇到，喺手機睇我唔夠眼力。點知呢位老朋友一睇完啲條件，即刻打畀我，叫我唔好簽，咁我先喺手機慢慢放大啲字嚟睇。」

咪咪姐慶幸上天眷顧，仲未簽文件就發現問題，佢表示自己好驚睇字，可能有人知佢性格，唔會防範有人害佢，咁就令佢爭啲中招。咪咪姐以往開演唱會，都交由相識多年嘅演唱會之父張耀榮主辦。2014年張耀榮離世後佢兩個演唱會都同張生嘅拍檔合作，同樣憑一個「信」字，由主辦方向佢講解合約內容，唔使佢過目，一直相安無事，估唔到呢份「安心」，就咁畀「有心人」利用。

咪咪姐指呢位「裝」佢嘅朋友識咗好多年，稱：「有兩條條款好毒喎！就係要我所有演唱類型，由2022年至2024年版權都要歸佢公司所有！我同你做演唱會，你竟然hold我兩年？」然而呢項咁霸道嘅合作條款，事前完全冇同咪咪姐口頭提及過。咪咪姐單係呢兩個月已經有七場走埠登台，如果簽咗版權歸「朋友」所有，咪咪姐蝕到入肉，佢話：「邊有人整啲咁毒嘅嘢，我十個登台工作，有七、八個都喺海外，你話係咪黐線？登台工作係我自己接㗎！所以我好感激幫我一眼睇出合約有問題嗰位朋友。」

撰文：娛樂組

圖片來源：東星娛樂