「班長」程浩駿自從成為《開心無敵獎門人》節目的新任「獎老」之後，成功擺脫以往扮演御用黑社會的「戾氣」，逐漸「入屋」受到家庭觀眾的歡迎。班長坦言熱愛演戲但難免經常遇到經濟不穩的情況，曾經做過外賣員，現時跟朋友開設製作公司，靠著科技去幫助教育，他不時執到正一正，經常出入學校傾合作，以另一個身分幫補生計，「搵錢之餘幫到人，我覺得成件事係無價！」
開心無敵獎門人丨「班長」程浩駿靚靚女友抽中大獎 命中注定冇造馬：呢個煲唔掟得【下一頁】
入行六年的班長以往經常獲安排在劇集中扮演黑社會或者小混混的角色，目露凶光時殺氣十足，自從《愛上我的衰神》扮飲食KOL「忌廉賓」後，再獲曾志偉賞識加入《開心無敵獎門人》做「獎老」，他笑言形象有所改變，「入行幾年，一直以來都冇人認得，播《獎門人》呢半年期間分別真係好大，多咗好多人認得自己，嗌我班長或者叫我加油，真係幾開心。」他笑言《獎門人》有好多小朋友忠實觀眾，多人認得自己，更令他多多警惕不可以行差踏錯，「亂過馬路都唔好喇，唔想做壞榜樣！」當然節目播完難免不捨，他都期待隔一段時間之後，節目可以重啟，繼續為觀眾帶來歡樂！
班長希望工作的機遇可以「更上一層樓」：「我咩角色都唔會推，但當然唔想做一個普通嘅嘍囉，有啲冇對白嘅真係好難有發揮空間，一係做黑社會大佬囉，我未做過嘛！」問到「獎老」過後工作有否大增？他表示沒有，始終演員收入不太穩定，難免要做副業幫補生計，「我做過外賣員，真係冇辦法，冇乜工開，加上拍劇時間好浮動，好難突然搵一份兼職，所以送外賣囉，我冇乜包袱，況且都係等人開門就咁遞畀個客，冇人會認得，加上我又唔係偷呃拐騙，只係努力搵錢開飯之嘛！」
班長一年多年跟朋友合資開設製作公司，近來跟教育界合作，推出協助老師們準備北上交流團的網上行程，利用VR技術大大減輕老師和學生的功夫，他笑言自己不時會穿西裝到學校傾合作，有不少奇遇，「去學校都有老師認得我，問我係咪班長，話佢有睇《獎門人》覺得好好笑咁，有時會問點解我做藝人但都要見客，我都係答佢為生計，我有好多個身分嘅。」他笑言最搞笑有一次跟其他客人開會見面，對方一直四周圍望，以為有隱藏鏡頭偷拍，誤會他是拍節目。
開心無敵獎門人丨程浩駿「人棄王」踩入綜藝做獎老 有望洗底：真係唔夠薑寸曾志偉【下一頁】
要兼顧演藝工作和副業，時間忙到不可開交，班長認為自己年紀尚算年輕，好應該努力花幾年時間向前衝，「入行初頭兩、三年都全心投入演藝事業，幸好家人體諒我收入唔多，冇畀太大壓力我，但我冇兄弟姊妹，一定要為屋企人著想，加上我都想成家立室。單係做演員，有時真係連開飯都冇錢，有時開通宵收凌晨三、四點望一望銀包，幾攰都唔敢搭的士返屋企。」後來班長跟兩位圈外朋友夾份，跟身邊的教師朋友了解後，發現未有專屬的電腦應用程式去協助他們工作，所以他們排除萬難去製作相關的程式，希望幫助到人。「幫到人又搵到錢，成件事係無價！放棄好容易但堅持好難，堅持落去而成功真係好有滿足感。」
班長稱現時仍算創業初期，但幸好的是令他終於有無顧之憂，「若然演藝事業有咩三長兩短，我都有嘢可以支持住生計，拍戲唔一定日日有工開，唔一定有固定收入，但起碼有呢間公司，我唔會冇飯開先。」他感激女朋友體諒，明白他是事業衝刺期，就算通關仍未能去旅行都理解，「去蛇口兩日一夜當然冇問題，但我而家時間真係拚搏緊，寧願努力衝多幾年，之後可以真係舒舒服服、資金充裕咁飛個幾星期，唔想連去旅行都要勒住勒住銀包。多謝女朋友好明白理解，亦相信我會成功！」
U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】
場地：PHENOMENON WINE‧DINE（THE ONE）
攝影：何家賢
撰文：楊安莉