阿一布偉傑突然宣布結束5年婚姻 哽咽祝福前妻：我想佢開心

有「TVB御用外國人」之稱的布偉傑（一哥）日前在抖音宣布與結婚5年的化妝師太太Celia離婚，正式結束第二段婚姻。布偉傑喺維港海景前拍攝短片，神情略帶哀傷，語氣輕鬆交代同前妻已離婚，佢表示：「啱啱係正式離咗婚，其實真正背後原因我自己都未搞清楚。我哋去申請離婚嘅時候，嗰日朝早搞掂咗啲手續，去食早餐、食完早餐去睇場戲，跟住食午餐，跟住一齊做義工，食晚餐，跟住就講拜拜，各自返自己屋企。」

同場加映：  流水落花︳鄭秀文人生感圓滿唔恨被嗌媽媽 陸駿光體會做天后老公有壓力

{{hket:ul-video id="7639"}}{{/hket:ul-video}}

布偉傑指未搞清楚離婚原因，但就有所猜測：「呢3年我嘅經濟開始不穩定，做司儀活動、拍戲完全停晒，我認為係因為呢個壓力，令生活模式變咗，佢先（前妻）提出不如做番好朋友。」布偉傑聽到時晴天霹靂，難以接受：「開頭我都唔接受，我知道有問題但係我好想解決問題，佢講嗰晚，我喊咗成晚。（如果）有一日我知道，一嫂（前妻）有番男友想再結婚，我冇問題，我想佢開心，我會祝福佢，呢個真心。」

{{hket:inline-image name="WhatsApp.jpeg"}}{{/hket:inline-image}}

阿一於美國出生，外國人面孔嘅佢大學時主修中國文學及亞洲研究，不但講得一口流利廣東話、普通話、英語及柬埔寨語，睇中文劇本都完全無難度。阿一1999年來港並開始演藝生涯，至2006年加入無綫後成為「御用老外」，幾乎包攬所有外國人角色，包括外籍警司、恐怖份子、神父，都由他上陣，而最為人熟悉的是2007年處境劇《同事三分親》嘅韋一，反而好少人知佢真名係布偉傑。

阿一布偉傑2016年同拍拖3年嘅化妝師女友Celia拉埋天窗，同時結束同無綫11年賓主關係。離開後希望多返內地工作，拍網劇及電影，想賺多啲錢，畀太太更好嘅生活，佢曾坦言TVB收入無可能養家，只係為咗賺知名度。阿一當時表示北望神州純粹為掘金，表示：「內地嘅演員都係講普通話多，識得講廣東話嘅少，而講廣東話嘅外國人就更少，我覺得呢個係我嘅優勢。不過無論喺內地搵到幾多錢都好，我永遠都係一個香港人。」可惜一個疫情巨浪令阿一所有計劃化為泡影。

唔少網民認為阿一嘅短片就正正透露佢同太太係因為「錢銀」離婚，留言：「貧賤夫妻百事哀！努力搵錢啦，你有機會再搵番個嘅」、「經濟是婚姻的基礎」都有人大讚佢夠豁達：「祝福你！能做到好聚好散的確不容易。」

撰文：娛樂組