玩出禍丨余迪偉憶同性前度不堪被歧視自盡 艾粒道歉撲火：更改餘下場次內容

少爺占及當奴噚晚舉行一連四場嘅艾粒part 2演唱會，二人喺演唱會熒幕播放咗「迪偉同你浸溫泉」，見商台DJ余迪偉赤裸上身嘅圖片，事後余迪偉在IG貼出現場相大鬧：「Enough is enough! 你哋都玩咗咁多年啦，我都冇出聲咁多年啦，你哋都有頭有面有地位，仲玩？呢張相係我IG嘅，有冇經過我同意上你哋個大台去賺錢呢？呢單嘢係性取向歧視同埋職場欺凌！」

同場加映：風再起時丨郭富城掌摑梁朝偉感壓力 「點捨得一巴伸落去吖」

{{hket:ul-video id="7575"}}{{/hket:ul-video}}

今日Do姐開咪前都問候迪偉，而少爺占同當奴亦IG出Post道歉：「就日前艾粒騷以過去環節文化節拍重溫一事而闖出的禍，令當事人迪偉先生受到冒犯，我們鄭重地衷心向迪偉先生道歉🙇🏻‍♂️感謝迪偉大人有大量，得知你已接受道歉，我們萬分感激，我們會更改餘下場次節目內容，並承諾以此為鑒，日後會更加小心顧及所有人感受。我知道錯了🙇🏻‍♂️🙇🏻‍♂️對不起。」

{{hket:inline-image name="822f45993fa0049a5152112b6401ff91.jpg"}}{{/hket:inline-image}}

余迪偉今日下午4點在商台門外見傳媒，佢表示：「噚晚我有朋友睇咗show，send咗張相畀我，我都覺得過份咗，佢攞咗我張相我冇同意過，都唔知有呢一part，收到呢張相我就有感而發，就寫咗enough is enough，夠喇咁多年我都覺得真係。我自己身邊都有好多好多朋友受到職場欺凌、性別身份認同欺凌等等……自己2018年嘅show都講過一單設身處地嘅事情，就係我曾經有個ex，後尾成為好朋友，佢都因為承受唔到呢啲歧視壓力，佢租咗一間屋燒炭自殺死，我咁多年都耿耿於懷。雖然我開咪成日談笑風生冇嘢，咩都冇所謂，我做人都光明磊落，但今次我嘅嬲唔單係為自己發聲，仲係為一眾受到歧視嘅人發聲。好多人都問我會唔會原諒佢哋，我梗係原諒啦，始終一齊做嘢，但去到某個位，我要話你聽，原諒還原諒，嬲都會完，但歧視唔會完。我想藉今次出呢個post話畀大家知，is about time to stop ，enough is enough，唔好再有下次。」

迪偉表示其實二人已即時有反應：「噚晚占奴都有msg我，話對唔住，聽日個show都會cut咗呢一part，頭先3點左右開咪時，佢哋都IG出咗post叫我大人有大量原諒佢，當然我都會原諒。（會唔會要佢哋親自道歉？）或者之後啦，佢哋做緊騷唔好搞佢哋喇，the show must go on，我諗佢哋會嘅，但我唔會特別要求囉，佢哋嘅道歉都係真誠同有心嘅，我覺得。我發聲唔係只係嬲，想以後嘅路……細過我好多嘅同性戀，係咪應該受到呢啲說話？我想大家嘅路有機會容易啲行。」

迪偉表示差唔多嘅事情已經多次發生：「《迪偉俱樂部》、《迪偉後花園》之前巨星籃球賽，我同傑朱、余德丞代表節目出場，兩個壯男捧我出場，我去射波……我自己唔知……佢哋揸住咪講迪偉掂過個籃球污糟，唔好掂……後尾我friend send番片畀我我先知，收到海量私訊，話佢哋咁介紹出場好衰，唔得咁樣喎，我都有反映，我啲fans都話有寫信去公司，甚至去平機會等等……佢哋係知道有呢啲事情。今次佢個騷用咗我幅相，如果佢問我我會問佢搞咩，但佢今次係冇問我。」迪偉指自己之前都冇親口同佢哋正面反映感受，忍耐有十年八年咁上下時間，認為而家係時候停止。被問到怕唔怕得罪兩位高層，佢就話：「都要面對啦，大把行出嚟平權嘅人之後都會有啲不幸，唔知，我覺得係要做。」

迪偉指公司都有介入調停事情：「公司都好支持，話嗰兩個嘢係玩過份咗，叫我原諒佢。」迪偉話唔怕一齊工作會有芥蒂，覺得工作還工作，職場上有朋友係bouns。被問到仲當唔當二人係朋友，佢就話：「可以算係，如果佢哋當我係，我冇所謂，我面對太多呢啲東西，我唔會尷尬，我想講，我唔係大量，但如果呢類事情去到一啲心靈脆弱嘅人身上會點呢，就算你唔自殺，可能會depression，會焦慮，面對唔到個人生。」迪偉再三強調希望所有人終止歧視。

撰文：娛樂組