流浪地球2丨劉德華爆與朱麗倩同樣溺愛囡囡 全家劉向蕙最大用愛融化皇帝女

劉德華近日馬不停蹄為明天（9日）上映的電影《流浪地球2》進行宣傳，戲中與內地小演員有一段感人父女情的華仔，坦言做了爸爸後更容易投入演出。而華仔的女兒劉向蕙（Hanna）今年10歲，他前日在訪問中罕有提及愛女，自爆和太太朱麗倩同樣溺愛女兒，以至Hanna在家中無人怕；身為天王的華仔，閒時亦會指導女兒上網課，但他忍不住慨嘆：「真係煩到吖！」

華仔在《流浪2》中飾演一名研究數字生命的科學家，身為特別演出的他，由原定的40組戲，增加到50多組，所以後半部的戲份比主角吳京還要多，「結局係講數字生命嘅開始，我哋最初討論時，都諗緊如果可以繼續嘅話，會將呢個數字生命延續落去第三集，佢哋都希望我第三集會繼續出現，亦想有更加唔同嘅演員加入，而第三集會講平衡宇宙，或者一啲永恒不死嘅訊息。」為了演活科學家角色，華仔事前特別做了資料搜集，並要記下繁複的科學數據，角色尤其專業，完全跟他過往演過的科學家角色不太相似，感覺特別新鮮。

{{hket:inline-image name="DSC_5616.JPG"}}{{/hket:inline-image}}

戲中華仔與女兒「丫丫」的父女情十分感人，他透露開拍前，特別跟小演員相處了十天，每天像父親一樣照顧她；華仔直言做了爸爸後更易投入角色，「易搞好多，哈哈！我記得拍《五億探長雷洛傳：雷老虎》時有兩個小朋友，我曾經發過小朋友脾氣，因為係現場收音，佢哋係咁呱呱嘈，我直情捉佢入後巷，同佢講『你好靜一陣呀！』，但當你做咗爸爸之後，你就知道細路仔係咁，佢哋經過咁長時間拍攝會無耐性，例如我同佢做功課做咗兩個鐘，佢實忟。（你同阿女做功課都係咁？）係呀。」

華仔在戲中對女兒的愛相當執著，他笑指現實中對待愛女是，「總之我個女鍾意點就點啦！唔算慈父，直情係溺愛。（衰醜人留畀媽咪做？）我哋兩個都溺愛，佢喺屋企無人怕㗎，但佢會折服喺我哋嘅愛底下。」華仔與該片導演郭帆在青島拍攝時，曾分享過育兒問題，兩人均異口同聲最怕教網上功謂，華仔皺眉道，「真係煩到吖，好似戲入面咁，阿囡問爸爸『呢條題目點做？』，我覺得最難嘅科目係英文，佢教番我轉頭呀！」工作繁忙的華仔經常周圍飛，過往很多時要跟囡囡視像見面，「做演員有時同太空人無分別，喺阿囡細個時，我同佢視像，佢會掟電話，佢話『我要真人』，但點真得啫？依家就習慣咗。」

華仔透露拍攝水底戲時要穿上潛水衣，為免不要令身體飄浮，他要將鉛放入潛水衣內，讓身體可以沉入水底，若遇到危險或其他問題，便用手勢向負責拯救的專業潛水人員示意，做足安全措施。華仔指自己不算是科幻迷，但喜歡看與「人性」結合的《E.T.外星人》；人類快將可以實現星際旅行，但華仔指自己沒有這欲望，「我無呢個夢，上到去都係飄浮，又唔可以喺上面歎杯咖啡。」提到內地的科幻電影，華仔形容仍是剛起步，「我哋拍《流浪2》每日都有犯錯，導演有個團隊記低，希望下一集唔好再犯，只要虛心學習，點都會做到。」

採訪：倪小珊

攝影：林良明