御用阿媽 |71歲程可為不獲無綫包薪續約 效力50年感被離棄：好難過唔開心

71歲有「御用阿媽」之稱嘅甘草演員程可為係無綫電視早期嘅二線女演員，亦曾經係備受力捧嘅花旦之一。不過日前程可為受訪時就透露自己兩年前已經不獲無綫包薪續約，效力無綫50年嘅佢回復自由身，佢亦坦言感到難過。

同場加映： 連詩雅單親背景成長望組完整家庭 將嫁陳家樂望愛情保鮮：Never Stop Trying

{{hket:ul-video id="7557"}}{{/hket:ul-video}}

程可為日前現身西貢參與港台電視劇集《我們的畢業禮》拍攝，程可為透露兩年前無綫不再包薪續約，改為簽一年一個騷，佢表示：「我真係有一段時間係好唔開心，好難過，始終我由無綫第一期訓練班做到而家，喺無綫效力咗五十年，突然間佢哋咁樣對我，我係接受唔到，好似被人離棄咁。」不過程可為亦非常體諒其他人嘅難處，認為同經濟唔好有關：「對方可能支出大，加上我又年紀大，要諗返人哋嘅處境，體諒吓人，自己放寬去諗，就唔好令自己難過，就會變得開心啲。」

程可為亦表示拍港台電視劇相對無綫輕鬆得多：「港台開工時間最早就係早上6點，最多拍到晚上10點就會收工，好少會拍到天光，所以對我而家咁嘅年齡係最適合。而無綫佢哋就唔會理，佢哋編咗幾多場戲，就要拍晒佢，有時拍到凌晨收工，幾個鐘後又要跟住開工，真係有時冇得瞓都好辛苦。」

{{hket:inline-image name="15_600.jpg"}}{{/hket:inline-image}}

程可為1972年報讀無綫電視的演員訓練班，與甘國亮、許紹雄、金興賢、呂有慧等人為同學。1970年代中與莊文清、高妙思、盧宛茵等女藝人受到公司力捧，其首部參演、佔重戲份的電視劇集係1975年嘅《乘風破浪》。

於無綫前後服務50年，拍過128套劇，近20年媽媽形象深入民心，不過就心如止水，從來都唔恨拎獎：「程可為三個字，觀眾都知我係乜水啦，唔通仲想攞視后咩？唔好咁癲啦，攞嚟做咩？一嚿膠，終身成就獎？更加唔好，畀舊膠我，睇見都好笑，求其一個三角型嘅膠，就開心到眼淚都出理？有冇搞錯呀？」

1996年，程可為由温哥華回流，穩坐女二角色，當時一線女藝員為汪明荃、趙雅芝等，程可為未試過上一線，但就一啲都唔介懷：「女仔嚟計，唔算妹丁，或者企埋一二邊嗰啲囉，又唔會眼紅人點解自己無得擔正，我好後生已冇呢個心喇，唔知點解，我都解釋唔到，好多人覺得我好強爭勝心，其實我唔係囉，可能個性生出嚟係咁。」程可為現實中未婚亦冇子女，但就唔覺得人生有咩欠缺，反而覺得輕鬆冇負擔，亦唔會覺得後悔，自己活得精彩。

程可為指自己由細到老都唔熱血，但就從來冇推過job，有時被笑戲份少都接，但佢就因為鍾意做戲所以咩都做，覺得任何角色，你有心去做，都可以發揮。程可為最記得《宮心計》中演「蔡仲屏」一角，劇情講佢被踢出宮又無任何倚靠，對佢嚟講非常有發揮，已經令佢好開心。

圖片來源：東星娛樂

撰文：娛樂組