日前有消息指現年23歲嘅姜濤,本月初以首置名義入市,以1,800萬元買入西環維壹一個海景單位。姜濤曾經話過要喺30歲前買兩層樓,盧覓雪昨日(18日))在其主持的電台節目《在晴朗的一天出發》中,多次大讚姜濤年紀輕輕做業主實屬叻仔及勵志。
同場加映: 蘇麗珊轉跑道做歌手要有強大心臟 負評不上心 感恩男友成最大後盾
盧覓雪表示:「23歲,1800萬都唔係少錢,佢夢想成真,因為之前有講過30歲前買兩個單位,如果咁推算落去,30歲應該有7個單位。而且佢係成為鏡仔第一個做業主,咪好威?威過拎我最喜愛的男歌手。」其後林海峰亦指唔少獎座都係塑膠製造,認為應該追「磚頭」先係最實際。
節目播出後,唔少人在「叱咤903 在晴朗的一天出發」 fb專頁留言指出MIRROR成員李駿傑 (Jeremy)才是首位做業主的鏡仔,事關Jeremy2021年已經抽中「綠置居」,買入啟鑽苑一個400呎單位。見到網民相關留言,盧覓雪竟然回覆:「居屋係有條件購買嘅」並加上一個伸脷emoji,似乎並唔認同居屋係「做業主」。留言隨即引來更多回覆「有條件唔代表唔洗錢」、「居屋唔係業主咩」,盧覓雪其後將留言刪除。
不過事後仍有網民於討論區口誅筆伐盧覓雪,認為佢嘅言論有睇唔起Jeremy嘅意味,留言:「咁佢(Jeremy)一定無姜濤搵咁多,但按自己能力腳踏實地都要畀人話?」、「揶揄最喜愛的男歌手獎不及磚頭有價值,又揶揄埋Jeremy嘅居屋,讚姜B咪讚囉!」、「買間屋都要分鏡入面邊個第一邊個第二,盧覓雪私底下鍾意點講都得,但係喺電台咁講就唔係咁好啦。」
撰文:娛樂組