劉鑾雄記者會丨大劉經常被「屈」有創傷後遺症 與呂麗君同行乃皇室堡發火主因

去年12月23日（周五）下午5時30分，富商劉鑾雄（大劉）喺佢旗下商場同一名男子發生衝突。事緣有一名男子坐喺商場嘅柱旁，大劉見狀即時大聲問對方：「你做乜坐喺度呀？」當時男子回應「有啲攰」，大劉就大鬧該名男子：「你知唔知你阻X住晒呀！喂！走啦！使唔使搵人趕你呀？你冇做啲嘢阻住人啫……而家有人影喇！」隨即有多個保安拉走男子，而企佢身邊嘅前女友呂麗君（現名呂姵霖）就無出聲。

同場加映： 劉穎鏇自小患嚴重濕疹曾向媽媽發脾氣 爸爸陪來港發展與母分隔：我好自責

{{hket:ul-video id="7331"}}{{/hket:ul-video}}

事件引起討論，有人指大劉患有狂躁症，更有傳大劉同呂姵霖復合，令男方急急跳出嚟澄清。早前大劉已對此就出澄清聲明，不過佢仍然決定於今日早上11點再開記者會交代事件。

大劉先講，自己公司處理得唔好，畀該名男子踎喺地上，佢講述事發經過：「我行過嗰陣時，咁我就冇位過，嗰陣時下午5時30分過時過節好多人……我平時屋企行路或者出街少則一個保安多則兩個，我行行吓會休克，呢啲係事實唔係作出嚟幫自己解釋。我細細聲叫嗰條友起身唔好阻住人過，但叫極佢都唔肯起身『本pair』，自私自利。咁嗰陣時我就過唔到，唯一就揩住佢個身過，但問題一轉身戟倒我，跌落地少則斷兩條骨，重則後腦跌落地下會死！」

{{hket:inline-image name="5zNjSUi-Ig_nc4zDUxGn0eFGCGvH6iahtWzUbrVs1G4.png"}}{{/hket:inline-image}}

大劉續指唔想同人有太近距離接觸，打咗五劑疫苗嘅佢表示一嚟怕會中新冠肺炎：「商場少部分人冇戴口罩，萬一佢哋中咗招傳畀我，就九死一生！我有食抗排斥藥，打咗針都係得四成效果，一中咗招就好危險，我年紀都唔細更何況（接受過）器官移植、食抗排斥藥……仲有一樣仲恐怖……」而另一個原因，佢就指怕畀人「屈」：「萬一佢認到我係大劉，唔使攞綜援住劏房又話我強姦非禮。唔好以為我講笑，四、五年前有個大陸女人帶住個女上嚟我公司，閃上嚟我寫字樓話帶個女嚟，叫我一世照顧佢，話如果我唔見佢就即刻開記者招待會。當時我律師就話係刑事恐嚇，再唔走可以報警拉佢，當你見到呢啲咁嘅嘢你驚唔驚？」

大劉指不時有人想喺佢身上「搵着數」，有如恆河沙數：「狂躁症我就一定冇！創傷後遺症我就一定有，試過唔識佢㗎，無端端送盒茶葉嚟我公司，又話識我阿媽又識我阿妹。幾年前我喺律師樓分咗身家畀我啲仔女，當你畀人知道身家有幾多，日日有人打電話嚟打我主意。」大劉指平均一個月打去公司混吉白撞要同佢傾電話嘅人少則十幾個，多則二、三十個，以前就係女人多，而家男人多；又話自己最細個女得4歲，細仔得10歲，要長命多幾年睇住佢哋大，所以好驚同人「揩住」。

大劉表示自己發火除咗因為「過唔到」，仲因為唔想畀人見到同前女友一齊，又搞笑咁指拍片人同佢每晚睇《愛·回家之開心速遞》嘅食屎陳師奶相似：「我晚晚食飯冇嘢做睇《愛回家》，入面有個叫食屎陳師奶，呢個係諸師奶、八師奶，佢攞電話影緊我相，我冇嬲佢，啲人層次係咁……當我（諗到）影到呂麗君即係呂姵霖我就好嬲！因為我唔想畀人見到而誤會造謠，話我哋行商場復合。」 

撰文︰娛樂組