《萬千星輝頒獎典禮2022》將於1月8日舉行，今日頒獎禮率先公布16個大獎的十強名單，部分入圍者出席記者會，趁機會為自己拉票。十強名單中，「最佳男、女主角」之中，最令人驚訝的是《十八年後的終極告白2.0》的譚俊彥和龔嘉欣雙雙「落馬」，無緣晉級。龔嘉欣在台上突發感言說：「冇提名唔代表冇實力！」
同場加映：《空肚講宵夜》三周年丨「八婆」成陳俞希代名詞人人恨要 蔡瀚億梁祖堯感恩觀眾睇得開心
萬千星輝頒獎典禮2022｜陳山聰15項提名同林敏驄爭視帝 陳瀅鮑起靜江美儀角逐視后【下一頁】
「最佳女主角」方面，大熱的陳煒、江美儀和陳瀅都有現身拉票，加上「影后級」人馬鮑起靜，絕對是競爭激烈。不過龔嘉欣《十八年後的終極告白2.0》就未能打入十強，她在台上為「最受歡迎電視女角色」拉票時一臉感慨說：「每個角色對劇集都好重要，冇提名唔代表冇實力，呢個好重要。拍《十八年後》時好大壓力，好怕演得唔好會影響套劇，幾場好重要好重要嘅戲，多謝Shaun（譚俊彥），雖然佢今日冇嚟，佢同我同一類人，大家都係博到盡嘅人，危險嘅嘢就自己做，慶幸今次拍檔係佢！拍《殺手》嘅傷，直到今日我仲睇緊物理治療，手指尾就係咁斷咗，我記得有日去樂小姐（樂易玲）間房，佢捉住我隻手時，佢好心痛。」她一邊講一邊哽咽，稱自己由十幾歲到三十幾歲都留在娘家TVB，會繼續努力。
對於未能晉身視后十強，龔嘉欣受訪時坦言沒有失望，「每次有提名已經好開心，因為唔容易㗎，獎真係真係好難攞㗎！當去一個party，同事之間互相鼓勵，恭喜對方，戥對方開心，我覺得成件事都好開心。」提到她站在台上看似有點感觸，龔嘉欣表示因鼻敏感所致，「近排身體唔係幾好，可能感受會大啲！」她拍《殺手》時搞到周身傷，以致現時仍要做物理理治療，說：「我有問醫生，佢話全部都係舊患，我係痛到瞓覺都起唔到身！條頸硬...早兩個禮拜，我都幾嬲自己咁孱，呢度唔舒服嗰度唔舒服！」還有哪裏不舒服？她補充：「之前我都有講過，心囉！心臟囉！我都唔好意思講，嗰陣我拍《新四十二章》請過一日病假，因為我心口真係好痛好痛，Joe監製（陳維冠）好擔心，佢叫我唔好返嘞，叫我喺屋企休息一日。」
《十八年後的終極告白2.0》播出時成為熱話，現在的聲勢卻有點弱，龔嘉欣說：「我唔知咩原因，我記得播時評語都好好，成績唔錯，唔緊要啦！我post精華片段畀大家睇，其實都開心嘅，努力咗，其他嘢唔係我哋控制範圍。」問到是否覺得早前寸爆陳瀅而受影響？她即時澄清：「其實呢個我好想講番，成件事都幾無辜，其實我冇講過！我都唔知點解件事會發酵成咁。我因為呢件事同身邊前輩傾過，大家都覺得，最緊要問心無愧。我真係冇講過，真係冇做過，咁樣就OK啦！當然有呢種報道，好老實講，自己有唔開心，我真係冇講過，（你講過乜嘢？）我從來冇評論過陳瀅，我覺得評論任何人，唔輪到我，係由觀眾去評論，唔輪到我去評論，所以我從來唔會講其他人。當報道發酵時，我都有諗好唔好講番清楚件事？前輩、屋企人都覺得唔使為咗呢啲小事特登去交代，總之自己問心無愧咪得囉！放心，我冇畀人雪藏，唔使擔心，公司好有誠意同我續約，而家傾緊，公司畀我好好條件，（加啲換獎條款？）你哋幫我寫...哈哈哈...有冇呢啲嘢㗎？冇呢啲嘢嘅，我攞嗰年都冇換獎，冇續約，冇呢啲嘢，自己畀心機做嘢，唔好理其他嘢。」另外她指在現場，未有機會跟陳瀅打招呼。
陳瀅在訪問中說，比較有信心「最受歡迎電視女角色」方面，自問實力未及「亞視幫」鮑起靜、陳煒和江美儀，「佢哋比我有經驗，呢個係事實，希望總有一日同佢哋平起平坐。（龔嘉欣不入十強？）總經理同我哋講，賽果係完全靠網民、觀眾投票，非常公平公正，呢十強係靠投票，可能因為佢套劇比較早播？（有傳你哋不和，見面尷尬？）唔會！作為女仔或女演員，做呢行已經好多嘢要煩同辛苦，呢啲是非嘢，我哋年紀唔細，唔係十幾歲，唔係玩小學生問題。」
而江美儀對於有沒有信心奪得「最佳女主角」，她表示能夠與鮑起靜齊名候選，已經當贏；但如果可以交換，希望將獎項留給劇集《下流上車族》得到「最佳劇集」。她接受訪問時稱：「好少可有提名，難得遇到好劇本、好角色，有功勞都係大家嘅。」
最佳男主角：
丁子朗《青春不要臉》
陳山聰《金宵大廈2》
郭晉安《回歸》
陳豪《白色強人II》
馬國明《白色強人II》
周嘉洛《痞子殿下》
林敏驄《下流上車族》
陳展鵬《超能使者》
黃宗澤《法證先鋒V》
黎耀祥《輕功》
最佳女主角：
李施嬅《金宵大廈2》
高海寧《童時愛上你》
陳煒《回歸》
胡定欣《白色強人II》
張曦雯《白色強人II》
陳瀅《痞子殿下》
劉佩玥《美麗戰場》
鮑起靜《下流上車族》
江美儀《下流上車族》
唐詩詠《超能使者》
最佳男配角：
馬貫東《愛上我的衰神》
戴耀明《青春不要臉》
鄭子誠《金宵大廈2》
吳偉豪《回歸》
張頴康《痞子殿下》
李成昌《凶宅清潔師》
林盛斌《美麗戰場》
鄧智堅《下流上車族》
林景程《下流上車族》
林子善《超能使者》
最佳女配角：
樊亦敏《愛回家之開心速遞》
麥美恩《愛上我的衰神》
姚子羚《鐵拳英雄》
趙希洛《金宵大廈2》
賴慰玲《雙生陌生人》
楊卓娜《童時愛上你》
蔣家旻《美麗戰場》
郭柏妍《下流上車族》
羅毓儀《下流上車族》
劉穎鏇《超能使者》
最受歡迎電視男角色：
何廣沛《異搜店》
張振朗《童時愛上你》
馬國明《白色強人II》
周嘉洛《痞子殿下》
朱敏瀚《痞子殿下》
洪永城《凶宅清潔師》
林敏驄《下流上車族》
陳展鵬《超能使者》
陳山聰《超能使者》
袁偉豪《法證先鋒V》
最受歡迎電視女角色：
樊亦敏《愛回家之開心速遞》
陳嘉慧《愛上我的衰神》
龔嘉欣《十八年後的終極告白2.0》
陳瀅《痞子殿下》
劉佩玥《美麗戰場》
蔣家旻《美麗戰場》
鮑起靜《下流上車族》
江美儀《下流上車族》
郭柏妍《下流上車族》
王敏奕《法證先鋒V》
最受歡迎電視拍檔：
吳偉豪、陳浚霆、焦浩軒《愛回家之開心速遞》
周嘉洛、陳瀅、JW王灝兒、朱敏瀚、張頴康《痞子殿下》
林盛斌、劉佩玥《美麗戰場》
林敏驄、江美儀《下流上車族》
陳展鵬、唐詩詠、陳山聰、劉穎鏇、林子善《超能使者》
方東昇、黃曉瑩、李曉欣、黃靖婷《尋人記II》
森美、郭偉亮、陳奐仁《聲夢傳奇2》
錢嘉樂、阮兆祥、麥美恩《開心無敵獎門人》
何泳芍、廖慧儀、胡美貽、陳若思《港女野人》
Maria Cordero、李家鼎《黃金盛宴》
最佳劇集：《愛回家之開心速遞》、《愛上我的衰神》、《金宵大廈2》、《回歸》、《白色強人II》、《痞子殿下》、《美麗戰場》、《下流上車族》、《超能使者》、《法證先鋒V》
最佳男主持：安德尊、李思捷、陸浩明、錢嘉樂、林盛斌、方東昇、森美、梁思浩、黎諾懿、阮兆祥
最佳女主持：陳庭欣、朱凱婷、吳幸美、Mario Cordero、麥美恩、陳凱琳、陳貝兒、汪明荃、賴慰玲、黃翠如
飛躍進步男藝員：陳浚霆、鄭衍峰、張馳豪、孔德賢、關曜儁、林子超、林景程、吳偉豪、黃建東、黃庭鋒
飛躍進步女藝員：陳曉華、陳嘉慧、何依婷、郭柏妍、劉佩玥、劉穎鏇、羅毓儀、戴祖儀、JW王灝兒、炎明熹
最佳綜藝節目：《思家大戰》、《聲生不息》、《聲夢傳奇2》、《通靈之王》、《開心無敵獎門人》、《港女野人》、《我們的主題曲》、《黃金盛宴》、《CP訓練營》、《中年好聲音》
最佳資訊及專題節目：《流行都市》、《東張西望》、《娛樂頭條》、《360秒人生課堂》、《尋人記II》、《滿足的味道》、《無窮之路II──無價之保》、《星光匯聚成翡翠》、《霎時再感動》、《遊走世界天與地》
最佳年度及特備節目：《萬千星輝頒獎典禮2021》、《2022北京冬季奧運會》、《慶祝香港回歸祖國二十五周年文藝晚會》、《香港金曲頒獎典禮2021/2022》、《人生90好楓SHOW》、《2022香港小姐競選》、《星光熠熠耀保良》、《香港小姐再競選》、《萬千星輝賀台慶》、《歡樂滿東華2022》
U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】
採訪：黃寶蓮
撰文：楊安莉、黃曉妍