法證先鋒V 丨袁偉豪遭洪永城黃宗澤夾攻練EQ 被寸「面癱視帝」：點止咁少料

有人氣先有人討論，現年41歲上咗位嘅袁偉豪近年成為箭靶，多產小生除咗新劇新歌成為討論焦點外，都少不免有批評同負面聲音；就連早前《愛·回家之開心速遞》都抽佢水，講「軟飯王」及鬧傳媒事件！

袁偉豪不甘示弱，不時喺網上反擊傳媒以及網民，「不羈」嘅行為被指情緒不穩，同時老婆張寶兒力撐老公脾氣好。日前袁偉豪就同幾位藝人拍短片《法證先鋒V EQ訓練營》，用表現說話。

蔡潔、袁偉豪、洪永城、黃宗澤以及蔡思貝拍攝短片《法證先鋒V EQ訓練營》，節目搵嚟一啲網上尖銳嘅問題互問，挑戰大家友情同埋EQ底線。呢集輪到袁偉豪做目標，蔡潔話佢演繹《法證先鋒V》中角色時「講嘢悶」，袁偉豪一嚟就否認，表示只係語速慢，洪永城即時爆出一句：「咪又一樣。」袁偉豪「兇」洪永城：「講嘢悶同慢係兩回事！」洪永城唔敢問嘞，表示︰「我而家驚驚哋。」

同場加映：超能使者丨陳山聰多產又高質成視帝大熱 黐家全因老婆：後生梗係出去玩

{{hket:ul-video id="7025"}}{{/hket:ul-video}}

洪永城再讀出提問：「你套套劇都木口木面，分分鐘畀你攞埋個『面癱視帝』。」袁偉豪有啲唔知點回應：「點止『面癱視帝』咁少料呀？」洪永城追撃：「咁係咩呀Hollywood呀？」袁偉豪「晦氣」自嘲：「拎埋啲對白好悶呀咁樣，『最慢對白獎』。」蔡潔回應：「好啦咁我頒畀你……」雖然眾人大笑，場面仍非常尷尬。

{{hket:inline-image name="WhatsA.jpeg"}}{{/hket:inline-image}}

到黃宗澤讀出問題，指「袁偉豪每次拍劇髮型都係一樣，仲打風都吹唔郁……」袁偉豪呻自己拍到越來越少頭髮，此時洪永城伸手觸摸佢頭髮，即被袁偉豪打手，「唔好搞啦！」黃宗澤見佢咁著緊，發現呢個死穴笑稱：「佢好明顯好注重個頭。」事實上今次面對大家咁多問題，袁偉豪都冷靜回應，見招拆招，算係為「低EQ」指控作出平反。

袁偉豪近年是非不斷。「三億駙馬」又被網民開post群插走樣，令到佢嬲嬲發長文爆seed。今年9月，《香港電影金像獎》「最佳男配角」得主馮皓揚退修TVB藝員訓練班，導師之一嘅袁偉豪又跌落泥濘，遭網民質疑導師資格，事後佢喺Facebook轉發相關的報道，嬲嬲留言：「我欠咗你哋班傳媒？」

袁偉豪上月推出新歌《馬路英雄》，早前上《Star Talk》受訪，宣傳新歌及分享製作心得，亦有提及因近年慘成箭靶被攻擊而感到不公平和壓力大。之後袁偉豪喺IG再發長文：「點解啲報道，永遠都係錯重點？明明我係宣傳新歌，講吓近況，但係永遠出嚟都係錯重點？又繼續無限放大？」轉頭又刪走呢個限時動態。

撰文：黃蘊姿

圖片來源：影片截圖